საქართველოში ევროკავშირის ელჩი, კარლ ჰარცელი თბილისის საერთაშორისო აეროპორტს ესტუმრა. უცხოელი დიპლომატის სტუმრობა უკავშირდებოდა შენგენის ზონის ქვეყნებში გამგზავრების მსურველი მოქალაქეების შემოწმების საკითხს, რომელიც 2021 წლის პირველი იანვრიდან ამოქმედდება. ელჩი განმარტავს, რომ მიღებული კანონი, საქართველოსა და ევროკავშირს შორის უვიზო მიმოსვლის რეჟიმის გამართულ ფუნქციონირებას უზრუნველყოფს:
„უვიზო მიმოსვლა საქართველო-ევროკავშირს შორის არსებული ურთიერთობების ერთ-ერთი ყველაზე თვალსაჩინო წარმატებაა და ამიტომ ძალიან მნიშვნელოვანია, რომ თავიდან ავიცილოთ უვიზო მიმოსვლის ბოროტად გამოყენება და უზრუნველვყოთ ამ რეჟიმის მაქსიმალურად ეფექტიანი ფუნქციონირება. სწორედ ამ ძალისხმევის ნაწილს წარმოადგენს ევროკავშირის/შენგენის ზონის ქვეყნებში გამგზავრების მსურველი საქართველოს მოქალაქეების დამატებითი შემოწმების პროცედურის დანერგვა.
ეს არ არის ახალი შეზღუდვა ან ახალი პირობა. სიახლე მდგომარეობს იმაში, რომ 2021 წლის 1 იანვრიდან მგზავრების შემოწმება საქართველოდან მათ გამგზავრებამდე. როგორც მოგეხსენებათ, უვიზო მიმოსვლის განხორციელების პროცესში ჩვენ გარკვეული გამოწვევების წინაშე დავდექით. პრობლემების მოგვარების მიზნით, საქართველომ და საქართველოს პარლამენტმა მიიღეს მნიშვნელოვანი გადაწყვეტილება გამგზავრების წინა შემოწმების შესახებ კანონის მიღებასთან დაკავშირებით, რომელიც მისი ამოქმედების შემდეგ, უზრუნველყოფს ევროკავშირისა და საქართველოს შორის უვიზო მიმოსვლის რეჟიმის გამართულ ფუნქციონირებას.
კანონი ძალაში შედის პირველ იანვარს და მისი აღსრულება მოხდება თბილისის, ქუთაისისა და სხვა აეროპორტებიდან მგზავრობისა და შენგენის ქვეყნებში მოგზაურობის წესების დაცვის უზრუნველსაყოფად. წესები არ შეცვლილა და ჩვენ შენგენის ქვეყნებში მოქმედი წესებით ვხელმძღვანელობთ. განსხვავება არის მხოლოდ ის, რომ შემოწმება აქ, აეროპორტში მოხდება.
სავარაუდოდ, ეს ყველას ინტერესშია, საბუთებთან დაკავშირებული ყველა პროცედურა, ყველაფერი, რაც საჭიროა შენგენის ზონაში შესასვლელად, აქვე, თვითმფრინავის აფრენამდე განხორციელდება.
ჩვენ ვმუშაობთ საქართველოსა და ევროკავშირის შესაბამის უწყებებთან აღნიშნული შემოწმებების მაქსიმალურად შეუფერხებლად, საერთაშორისო სტანდარტებისა და რეგულაციების შესაბამისად ჩატარების უზრუნველსაყოფად. იმედი მაქვს, მომავალ წლებში ევროკავშირსა და საქართველოს შორის უვიზო მიმოსვლის მასშტაბები კიდევ უფრო გაიზრდება“, – განაცხადა კარლ ჰარცელმა.
ავტორი
ნინი შავლაძე
