დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, B ტიპის გრიპმა უკვე დაიწყო ცირკულაცია. მისი თქმით, დისტანციასა და სანიტარულ წესებს დაცვის შემთხვევაში, გრიპის სეზონი წინა წლებთან შედარებით, ოდნავ მსუბუქი იქნება:
„ჩვენ ვაწარმოებთ ყოველკვირეულ მონიტორინგს და კვირაში ერთხელ ვაახლებთ გრიპის ვირუსის და რესპირაციული ვირუსების ცირკულაციას ქვეყანაში და პირველად ორშაბათს გამოჩნდა, რომ B ტიპის გრიპის ვირუსმა დაიწყო ცირკულაცია. ამ სეზონზე პირველად გამოჩნდა გრიპის ვირუსი კორონავირუსის ინფექციასთან ერთად და ჩვენ არ ვიცით რამდენად აქტიური იქნება ის წელს. თუ ავიღებთ სამხრეთ ნახევარსფეროს გამოცდილებას, ზაფხულის გრიპი ნაკლებად აქტიური იყო და ამაზე ბევრი ვერსია არსებობს, მათ შორის ისიც, რომ მოსახლეობა მიეჩვია პრევენციულ ღონისძიებების დაცვას, ვთქვათ პირბადის ტარებას, უფრო მეტი ადამიანი აიცრა გრიპის ვაქცინით, იცავენ დისტანციასა და სანიტარულ წესებს. ამიტომაც შეიძლება რომ გრიპის სეზონი ოდნავ მსუბუქი იყოს, თუმცა რა თქმა უნდა, ეს დამშვიდების საფუძველს არ გვაძლევს.
რესპირაციული ვირუსების სეზონი უფრო აქტიურ ფაზაში შედის, ამიტომ იმ ყველა პრევენციული ზომების დაცვა, რაზეც ყოველთვის ვსაუბრობთ უნდა გახდეს სრულიად მანდატორული და ყველამ გავითავისოთ, რადგან დეკემბერში, იანვარსა და თებერვალში პირბადის ტარება აუცილებელია, ის დაგიცავთ გრიპისგან და Covid ინფექციისგან.
ამასთან ერთთად, პირველ რიგში გთხოვთ, ვისარგებლოთ იმ შესაძლებლობით გრიპთან მიმართებაში, რაც გვაქვს და ეს არის 2 მიმართულება:
- გრიპთან მიმართებაში – რადგან სახელმწიფოს ვაქცინა საკმარისია და რისკჯგუფები, მათ შორის ორსული ქალბატონები, აუცილებლად უნდა აიცრან;
- სერიოზულად ფართოვდება ტესტირების მასშტაბი, ამიტომ ვთხოვ ყველა სიმპტომიან ადამიანს, რომელთა სიებიც გამოქვეყნებულია ჩვენს ვებ-გვერდსა და ფეისბუქის გვერდზე, მივიდნენ კლინიკებში. მიბრძანდით და ჩაიტარეთ ანტიგენის ტესტი, ის პასუხს დაახლოებით 15 წუთში მოგცემთ.
რაც შეეხება კორონავირუსის ვაქცინას, მოგეხსენებათ, რომ არსებობს ე.წ. COVAX პლატფორმა, რომელშიც ჩვენ ვართ გაერთიანებული. ეს პლატფორმა შეისყიდის 4-5 ვაქცინას და ჩვენ ისეთი კონტრაქტით ვთანამშრომლობთ, რომ შეგვიძლია ავარჩიოთ სასურველი ვაქცინა. შემოტანის დრო უნდა იყოს მარტი ან აპრილი“, – განაცხადა ამირან გაყრელიძემ.
ავტორი
ნუცა ჯოხაძე
