,,სტრატეგია აღმაშენებლის” ლიდერი გიორგი ვაშაძე აშშ-ს ელჩის რეზიდენციაში ფასილიტატორებთან გამართული შეხვედრის შემდეგ აცხადებს, რომ უცვლელი რჩება ოპოზიციის მთავარი მოთხოვნა რიგგარეშე არჩევნების ჩატარება და საარჩევნო რეფორმის განხორციელება. ოპოზიციონერი ლიდერი ასევე აღნიშნავს, რომ საარჩევნო რეფორმის გარეშე ფაქტობრივად ნორმალური არჩევნების ჩატარება შეუძლებელია:
,,ჩვენი ამერიკელი და ევროპელი დიპლომატები ყველაფერს აკეთებენ, რომ შეთანხმება შედგეს. მათი მოწოდება ყველა მხარესთან მიმართებაში არის, რომ პროგრესულად ვიფიქროთ და ორიენტირებულები ვიყოთ შეთანხმებაზე. მეც დავაფიქსირე, რომ ორიენტირებულები ვართ შეთანხმებაზე.
ჩვენ, ოპოზიციაში ერთიანად უნდა ჩამოვყალიბდეთ საერთო პოზიციებზე, თუმცა, ღია შეთავაზებები ,,ქართული ოცნების” მხრიდან უნდა მოვისმინოთ, უკვე მესამე რაუნდზე. რა ალტერნატიულ გადაწყვეტილებებს ხედავენ გამოსავლის კუთხით ამ მძიმე კრიზისული მდგომარეობიდან?!
ჩვენი პოზიცია ამ ეტაპზე არ იცვლება. ეს არის რიგგარეშე არჩევნები, საარჩევნო რეფორმა. შემიძლია ვთქვა, რომ საარჩევნო რეფორმაზე არის პოზიციის თანხვედრა, მათ შორის, დიპლომატებთან. ისინიც ხედავენ, რომ საარჩევნო რეფორმის გარეშე ფაქტობრივად ნორმალური არჩევნების ჩატარება შეუძლებელია.
ხელისუფლებასთან თანამშრომლობა რომ შედგეს უნდა არსებობდეს რაიმე დოკუმენტი, ხოლო თუ ვერაფერზე შევთანხმდით, როგორ უნდა ვითანამშრომლოთ? ჩემი მოლოდინი არის, რომ 8 მარტის მსგავსი მემორანდუმი უნდა გაფორმდეს, სადაც გაწერილი იქნება, თუ რაზე შევთანხმდით“, – განაცხადა გიორგი ვაშაძემ.
ავტორი
ნინი ხიჯაკაძე
