“ლეიბორისტული პარტიის” ახალგაზრდული ფრთის წარმომადგენლებმა, გლდანულაში, ახლად რეაბილიტირებულ სკვერში ჩამოკიდებული “ქართული ოცნების” პარტიული დროშები ჩამოხსნეს, რასაც დაპირისპირება მოჰყვა. აღნიშნულის თაობაზე საინფორმაციო სააგენტო “პარალელთან” განმარტებები გააკეთა “ლეიბორისტული პარტიის” ახალგაზრდული ორგანიზაციის თავმჯდომარემ მიხეილ ქუმსიშვილმა:
,,გლდანულაში არის სკვერი, რომლის რეაბილიტაცია ცოტა ხნის წინ დასრულდა. ,,ქართულმა ოცნებამ’’ გადაწყვიტა ხალხის ბიუჯეტით გაკეთებული სკვერი უნდა ყოფილიყო ,,ქართული ოცნების’’ პარტიული დროშებით დამშვენებული, რაც არის საარჩევნო კოდექსის დარღვევა. აქედან გამომდინარე გადავწყვიტეთ, რომ ჩამოგვეხსნა პარტიული დროშები და მის ნაცვლად ჩამოგვეკიდა საქართველოს დროშები. ამის განხორციელებაში ხელი შეგვიშალა ადგილობრივმა ,,ზონდერებმა’’, რომლებიც გათამამებულები არიან მმართველი პარტიის მიერ. ისინი ფიზიკურად დაგვიპირისპირდნენ და სიტყვიერი შეურაცხყოფა მოგვაყენეს მე და ჩემს მეგობრებს.
მიუხედავად ყველაფრისა, ჩვენს მიზანს მივაღწიეთ, პარტიული დროშების ნაცვლად საქართველოს დროშები აღვმართეთ.
პოლიციამ დამკითხა და შეადგინეს ადმინისტრაციული სამართალდამრღვევის ოქმი. გაიმართება სასამართლო, სადაც წარვადგენთ ვიდეომასალებს, თუ როგორ დაგვესხნენ თავს.
დროშების წაღებას ვაპირებდით გლდანის გამგეობაში, თუმცა პოლიცია არ გვაძლევს ამის საშუალებას’’, – განაცხადა მიხეილ ქუმსიშვილმა.
ავტორი
ანა ბოგვერაძე
