ინფექციური საავადმყოფოს სამედიცინო დირექტორი მარინა ეზუგბაია აღნიშნავს, რომ ქვეყანაში არსებული ეპიდემიოლოგიური მდგომარეობა საყურადღებოა და საზოგადოებას მეტი პასუხისმგებლობისკენ მოუწოდებს. მისი თქმით, კონტაქტები ლოკალიზებულია და დაავადება მიდის შესუსტებისკენ:
“ბოლო 24 საათში გამოვლენილი 158 ახალი შემთხვევა ნუ შეგვაშინებს, თუმცა მიუხედავად ამისა ეს არ ნიშნავს, რომ რეგულაციები არ დავიცვათ. ეს ახალი შემთხვევები არ იძლევა პანიკის საფუძველს, მაგრამ მაინც უნდა გავამკაცროთ რეგულაციები საკუთარი თავის მიმართ.
ძალიან აქტიურად ხდება კონტაქტების გამოვლენა, შესაბამისად იზრდება ახალი შემთხვევების რაოდენობა. ეს ზუსტად იმის საფუძველია, რომ ჩვენ დაავადების ლოკალიზაციისკენ და შესუსტებისკენ მივდივართ, რაც კარგი გამოსავალია ამ ახლად წარმოქმნილი წერტილების, კერების, წყაროების და კლასტერების დროული ლიკვიდაციისთვის.
მთავარია, რომ ძალიან აქტიური მუშაობა მიმდინარეობს მთავრობასთან, სამედიცინო სექტორს რეგულარული ურთიერთობა გვაქვს ჯანდაცვის სამინისტროსთან, შესაბამისად დროული გადაწყვეტილების შედეგად დარწმუნებულები ვართ, რომ ეს სიტუაცია ისეთივე მართვადი და კონტროლირებადი გახდება, როგორც აქამდე გვქონდა,’’ – აცხადებს მარინა ეზუგბაია.
ავტორი
ანა ბოგვერაძე
