სკოლამ და მასწავლებელმა გაცილებით უკეთესად იცის რა სჭირდება მოსწავლეს, ვიდრე განათლების სამინისტროში მუდმივად ცვალებადმა ბიუროკრატებმა – გიორგი ვაშაძე

პოლიტიკური პლატფორმა „სტრატეგია აღმაშენებლის“ ლიდერმა გიორგი ვაშაძემ განათლების სფეროს წარმომადგენლებთან შეხვედრა გამართა. ოპოზიციონერმა ლიდერმა პედაგოგებს გააცნო „სტრატეგია აღმაშენებლის“ ინიციატივები განათლების რეფორმასთან დაკავშირებით და აღნიშნა, რომ სკოლა თავისუფალი უნდა იყოს პოლიტიკური წნეხისგან და უნდა შეიქმნას თავისუფალი გარემო, იმისთვის რომ სკოლამ თავისუფალი ადამიანები აღზარდოს:

„უმნიშვნელოვანესი საკითხი განათლებაა, რომელიც უნდა იყოს აღმშენებლობის პროცესის ფუნდამენტი. „სტრატეგია აღმაშენებლის“ გუნდს აქვს კონკრეტული ინიციატივები, პირველ რიგში, მასწავლებელი, სკოლა თავისუფალი უნდა იყოს პოლიტიკური წნეხისგან და თავისუფალი გარემო უნდა შეიქმნას, იმისთვის რომ თავისუფალი ადამიანები აღიზარდონ.

• პირველი: სკოლის დირექტორების პირდაპირი არჩევის წესი გვსურს რომ დავნერგოთ;
• მეორე: უნდა დასრულდეს გაუთავებელი ექსპერიმენტები მასწავლებლებთან დაკავშირებით;
• მესამე: ანაზღაურების საკითხი ძალიან მნიშვნელოვანია, როგორც მასწავლებლებისთვის, ასევე სკოლის დირექტორებისთვის;
• მეოთხე: კერძო სკოლების განთავისუფლება სახელმწიფო რეგულაციებისა და მარწუხებისგან, რომ მათ ჰქონდეთ შესაძლებლობა და თავისუფლება შექმნან სხვადსხვა ტიპის საგანმანათლებლო სივრცეები.
• მეხუთე: დაფინანსება სრულად უნდა მიჰყვებოდეს მოსწავლეს, აირჩევს ის საჯარო სკოლას, თუ კერძო სკოლას, თანაბარი უნდა იყოს დაფინანსება ორივეს შემთხვევაში. არა გარკვეული პროგრამებით მანიპულირებადი დაფინანსება, არამედ პირდაპირ უნდა იყოს ეს დაფინანსება;

სკოლის დირექტორების ხელფასი პირდაპირ ვამბობ, რომ უნდა იყოს მინიმუმ 3000 ლარი. იგივე, პრინციპი გვინდა ბაღის ხელმძღვანელებზე, ბაღის დირექტორების ხელფასი მინიმუმ 1500 ლარი უნდა იყოს, ამ ეტაპზე მაინც შემდგომში აუცილებლად ზრდის პერსპექტივით.

მთავარია, ჩვენ შევქმნათ დამოუკიდებელი არა განათლების სამინისტროსგან პოლიტიკურად მართული სკოლა, არამედ რეალურად დამოუკიდებელი, რომელიც თვითონ იღებს გადაწყვეტილებებს და თვითონ იმუშავებს მოსწავლეების განვითარებაზე, რაც მთავარია, მართლა, ვფიქრობ, რომ სკოლამ და მასწავლებელმა გაცილებით უკეთესად იცის რა სჭირდება მოსწავლეს, ვიდრე განათლების სამინისტროში მუდმივად ცვალებადმა ბიუროკრატებმა, რომლებმაც ექსპერიმენტების ფუნდამენტად აქციეს ფაქტობრივად განათლების სისტემა, კიდევ ვიმეორებ აღმშენებლობის მთავარი ფუნდამენტი არის განათლების სისტემა“, – განაცხადა გიორგი ვაშაძემ.

ავტორი
მარიკა ხორავა