ჟურნალისტი გიორგი კაპანაძე თამარ ბაჩალიაშვილის საქმესთან დაკავშირებით, ა.წ. 13 აგვისტოს სოციალურ ქსელში, ინფორმაციას აქვეყნებს, სადაც ასევე ურთავს ფოტოს, რაც შესაძლოა გამოძიებისთვის მნიშვნელოვანი აღმოჩნდეს:
“გამოძიებისთვის უცნობი ახალი ფაქტები მოვიპოვეთ თამარ ბაჩალიშვილის საქმიდან, რომელთაგან ამ ეტაპზე ჯერ მხოლოდ ერთს ვასაჯაროვებ…
“პირადად მე, უძლური ვარ მის წინაშე” – ეს არის თამარ ბაჩალიაშვილის ერთერთი ბოლო ფრაზა, რომელიც მან ფურცელზე დაწერა. აქვე წერია ციფრი – “15”…
ვის წინაშე ან რატომ იყო კიბერუსაფრთხოების სპეციალისტი უძლური?
რა ინფორმაცია ჩაუვარდა მას ხელში?” – წერს ფეისბუქის პირად გვერდზე გიორგი კაპანაძე.
აღნიშნული ინფორმაციის გამოქვეყნებიდან ორსაათნახევრის შემდეგ ჟურნალისტი ფეისბუქის პირად გვერდზე შსს-ში გამოკითხვაზე მისი დაბარების თაობაზე წერს:
“შსს-ში, გულუას ქუჩაზე დამიბარეს გამოკითხვაზე, დღეს, 20:30-ზე, ჩემს მიერ თამარ ბაჩალიაშვილის შესახებ გამოქვეყნებული პოსტის გამო, სადაც საუბარია იმ ჩანაწერზე, რომელიც მან სავარაუდოდ, გარდაცვალებამდე მცირე ხნის წინ გააკეთა და რომელიც ექსკლუზიურად გამოვაქვეყნე“.
დღის ბოლოს კი, გამოკითხვიდან გამოსვლის შემდეგ, ავრცელებს ინფორმაციას გამოკითხვის თაობაზე:
“მეგობრებო, გამოვედი დაკითხვიდან. მადლობა ყველას მოკითხვისთვის, ზარისთვის მესიჯისთვის, გულშემატკივრობისთვის… ❤️
სულ ორი კითხვა დამისვეს შსს-ში:
1. ვინ მომცა დოკუმენტი, რომელიც გამოვაქვეყნე, რაზეც ვუპასუხე რომ არ ვეტყოდი და არც ვუთხარი (რისი უფლებაც ცხადია მქონდა);
2. რა ურთიერთობა მაქვს თამარ ბაჩალიაშვილის მშობლებთან, რაზეც ვუთხარი რომ მათთან მაქვს ისეთივე პროფესიული ურთიერთობა, როგორც სხვა ჟურნალისტებს.
სულ ეს იყო.
რაც შეეხება საქმის მასალებს, მოუწევთ რომ გამოძიება მკვლელობის მუხლით გააგრძელონ.
კიდევ იხილავენ ფაქტებს,” – აცხადებს გიორგი კაპანაძე.
ავტორი
თამუნა მახარაშვილი
