საქართველოს დაავადებათა კონტროლისა და საზოგადოებრივი ჯანმრთელობის ეროვნული ცენტრის გენერალური დირექტორის, ამირან გამყრელიძის ინფორმაციით წლევანდელ ერთიან ეროვნულ გამოცდებზე ინფიცირებული აბიტურიენტების 2 ფაქტი გამოვლინდა. მისი თქმით განსაკუთრებით საყურადღებო სწორედ გამოცდები იყო, რადგან იქ ყოველდღიურად ადამიანთა ჯგუფი თავს იყრიდა, თუმცა ეს რთული ეტაპიც დაბრკოლებების გარეშე გადაილახა:
“მოგეხსენებათ ერთიანი ეროვნული გამოცდები იყო ყველაზე დიდი თავშეყრა ერთიანად ახალგაზრდების. დაახლოებით 50000-მდე აბიტურიენტმა, მაგისტრანტმა და მასწავლებლობის მსურველებმა ჩააბარეს გამოცდა და კარგი პარტნიორობა შედგა განათლებისა და ჯანდაცვის სექტორების, ასევე დაავადებათა კონტროლის ცენტრს შორის.
მოგეხსენებათ, რომ ამ გამოცდებზე ჩვენ გვყავდა 2 ინფიცირებული. ერთ აბიტურიენტს ჰქონდა კონტაქტი იმ 10 ადამიანთან ვისთან ერთადაც გამოცდას აბარებდა და ჩვენ დროულად მოვახერხეთ კონტაქტების იზოლირება, მათი კარანტინში გადაყვანა. თვითონ ამ აბიტურიენტსაც შევუწყვეთ ხელი, რომ მას არ დაეკარგა წელიწადი და გამოცდა ჩატარდა საავადმყოფოს პირობებში, მე მას წარმატებას ვუსუვრებ მთელი გულით.
ასევე გვყავდა მე-2 ინფიცირებული აბიტურიენტი, რომელსაც კონტაქტები არ ჰყოლია და ამ შემთხვევაშიც გამოცდა წარმატებით საავადმყოფოს პირობებში ჩატარდა. როგორც მოგახსენეთ, კარანტინში მყოფი აბიტურიენტები გაგვყავდა გამოცდებზე წინასწარი ტესტირების საფუძველზე და გამოცდის წინ თითოეულ მათგანს უტარდებოდა ტესტირება, ასევე ტესტირება უტარდებოდა მას, ვისაც გამოცდამდე სიცხე უდასტურდებოდა,” – განაცხადა ამირან გამყრელიძემ.
ავტორი
მახო ზავრაშვილი
