პარლამენტის თავმჯდომარის, არჩილ თალაკვაძის განცხადებით, ყოფილი პრემიერ-მინისტრი, მამუკა ბახტაძე, სავარაუდოდ, “ქართული ოცნების” პროპორციულ სიაში არ იქნება. ამ თემაზე მან ჟურნალისტებთან ისაუბრა.
“მამუკა ბახტაძე არის გუნდის წევრი, სწორედ ამიტომ ის ესწრებოდა “ქართული ოცნების” მაჟორიტარული სიის პრეზენტაციას. რაც შეეხება საპარლამენტო სიაში მისი ყოფნის საკითხს, ასეთი გადაწყვეტილება არ არის პარტიაში მიღებული და სავარაუდოდ, მამუკა ბახტაძე არ იქნება პროპორციულ სიაში,” – აღნიშნა პარლამენტის თავმჯდომარემ.
არჩილ თალაკვაძის განცხადებით, პროპორციულ არჩევნებში მონაწილეობას გუნდთან ერთად თავადაც გეგმავს და მისთვის არ აქვს მნიშვნელობა, სიაში რომელ ადგილს დაიკავებს.
“ჩვენს გუნდთან, “ქართულ ოცნებასთან”, მეც ვგეგმავ, რომ 2020 წლის საპარლამენტო არჩევნებში მონაწილეობა მივიღო, თუმცა სიაში რომელ ადგილს დავიკავებ, ეს ჩემთვის მეორეხარისხოვანია.
რაც შეეხება პროპორციულ სიას, ჩვენ უახლოეს მომავალში მას წარვუდგენთ საზოგადოებას. იქნება სიაში ჩვენი გუნდის არაერთი გამოცდილი წევრი, ასევე იქნებიან ახალი ადამიანები, რომლებმაც უნდა შემოიტანონ პოლიტიკაში უფრო მეტი ენერგია, უფრო მეტი პროგრესი და იდეები.
ჩვენ გვაქვს პროაქტიული დღის წესრიგი, ჩვენ ვართ მომავალზე ორიენტირებული გუნდი და რა თქმა უნდა, სიასაც დავაკომპლექტებთ ძლიერი კადრებით,” – განაცხადა არჩილ თალაკვაძემ.
ავტორი
მახო ზავრაშვილი
