შინაგან საქმეთა სამინისტრომ, ქუთაისში, ზვიად გამსახურდიას გამზირზე მომხდარი მკვლელობა გახსნა. დაკავებულია 45 წლის ქალი, რომელმაც მეზობელი შელაპარაკების ნიადაგზე ცივი იარაღით მოკლა.
“შინაგან საქმეთა სამინისტროს იმერეთის, რაჭა-ლეჩხუმისა და ქვემო სვანეთის პოლიციის დეპარტამენტისა და ქუთაისის საქალაქო სამმართველოს თანამშრომლებმა, ერთობლივად ჩატარებული ოპერატიულ-სამძებრო და საგამოძიებო ღონისძიებების შედეგად, 1975 წელს დაბადებული ბ.კ. განზრახ მკვლელობის ბრალდებით დააკავეს.
დანაშაული 7-დან 15 წლამდე ვადით თავისუფლების აღკვეთას ითვალისწინებს.
გამოძიებით დადგინდა, რომ ბრალდებულმა ქალმა მიმდინარე წლის 18 ივლისს, ქუთაისში, ზვიად გამსახურდიას გამზირზე მდებარე საცხოვრებელ ბინაში, თავის მეგობართან – 1989 წელს დაბადებულ ე.ჩ.-სთან სტუმრად ყოფნის დროს, ურთიერთშელაპარაკების ნიადაგზე, მასპინძელს ცივი იარაღით რამდენიმე ჭრილობა მიაყენა და შემთხვევის ადგილიდან მიიმალა. მიყენებული დაზიანებების შედეგად, ე.ჩ. ადგილზე გარდაიცვალა.
პოლიციამ დანაშაულის ჩადენის იარაღი – დანა ნივთმტკიცებად ამოიღო. ბრალდებული დანაშაულს აღიარებს.
გამოძიება განზრახ მკვლელობის ფაქტზე, საქართველოს სსკ-ის 108-ე მუხლით მიმდინარეობს,” – ვკითხულობთ უწყების მიერ გავრცელებულ განცხადებაში.
შეგახსენებთ, რომ მკვლელობა ქალაქ ქუთაისში 18 ივლისს მოხდა. სასიკვდილოდ დაჭრილი 31 წლის ქალი რამდენიმე საათი შველას ითხოვდა, ეს ხმა ესმოდათ მეზობლებსაც, თუმცა სამართალდამცავებისთვის არცერთ მათგანს არ მიუმართავს. ყველაფერი მოგვიანებით გაირკვა, როდესაც გარდაცვლილის სახლიდან ხმაური აღარ ისმოდა.
ავტორი
მახო ზავრაშვილი
