საქართველოს მესამე პრეზიდენტი მიხეილ სააკაშვილი სოციალურ ქსელ “ფეისბუკის” მეშვეობით ვიდეომიმართვას ავრცელებს, სადაც აღნიშნავს, რომ ივანიშვილმა საქართველოში კრიმინალები დააბრუნა და ქვეყანაში არსებულ სიტუაციას უკანონოს უწოდებს:
“ივანიშვილმა დააბრუნა ქვეყანაში 90-იანი წლების კრიმინალების თარეში. მისი შვილი, ბერა, რომელიც მეგობრობს „კანონიერ ქურდთან“ და მის შვილთან, „კაწროსთან“, შექმნეს კრიმინალური დაჯგუფება, რომელიც დადის და ხოცავს ახალგაზრდებს. ივანიშვილის ძმამ და მისმა ბიზნესპარტნიორებმა, ასკანელებმა, შექმნეს ასევე, გაკრიმინალურებული სპორტსმენების და ბანდიტების დაჯგუფება, რომელიც ატერორებს და ართმევს ბიზნესს, აშინებს პოლიტიკურ ოპონენტებს. ეს არის „ბეზპრედელშიკების“ გაბატონება საქართველოში.
მეგობრებო, ჩვენ არ გვყავს მთავრობა. მე მიმაჩნია, რომ საქართველოს მთავრობა არის მთლიანად არალეგიტიმური. მე არ ვცნობ არც ერთი წამით მის კანონიერებას და არ ვცნობ არც ერთი წამით იმ სიტუაციის კანონიერებას, რომელიც არის საქართველოში. ეს არის უკანონო სიტუაცია.
პირველად დამოუკიდებლობის შემდეგ, ამერიკის კონგრესმა დაგვადო სანქციები ჩვენ, როგორც ქვეყანას. ჩვენ ყოველთვის ვიყავით ამერიკის დახმარების მთავარი მიმღები. ჩვენ ვიყავით სანიმუშო, სამაგალითო ქვეყანა და ახლა სამუდამოდ, საქვეყნოდ მოგვჭრა ივანიშვილმა თავი, ყოველ შემთხვევაში, სანამ თვითონ არის იქ…
ჩემი ბრძოლა იქნება ძალიან გადამწყვეტი – მოსწონს ეს ვიღაცას, არ მოსწონს, უნდა ვიღაცას, რომ ვიყო წინა ხაზზე თუ არ ვიყო. მე ვიქნები წინა ხაზზე და გპირდებით, რომ მე ვიქნები თქვენთან ერთად ხელჩაკიდებული ოქტომბერში ივანიშვილის დამარცხების ფრონტზე და საქართველოს გადარჩენის ფრონტზე.
ეს უკანონობა, ეს არალეგიტიმურობა უნდა დამთავრდეს. ესენი არიან ბანდიტების ხროვა და დაჯგუფება. ესენი არიან საქართველოს მტრები, ესენი არიან მოღალატეები და, რა თქმა უნდა, უცხო ძალის მიერ გაკონტროლებული, მოსკოვის პირდაპირ დაკვეთას ასრულებენ საქართველოს დასუსტების, განადგურების, მსოფლიო იზოლაციის მისაღწევად და ეს ყველაფერი დასრულდება ძალიან მალე.
ჩვენი გადამწყვეტი ბრძოლა საქართველოსთვის არის ძალიან ახლოს. ამ ბრძოლაში მე ვარ ერთ-ერთი თქვენგანი, ერთ-ერთი ჯარისკაცი, მაგრამ ასევე, თქვენთან ერთად ვიქნები ერთ-ერთი გამარჯვებული!“ – აცხადებს მიხეილ სააკაშვილი.
ავტორი
თამთა ბარბაქაძე
