მთავრობის სხდომის დასრულების შემდეგ, ფინანსთა მინისტრმა ჟურნალისტების კითხვებს უპასუხა. ივანე მაჭავარიანის თქმით, წლის ბოლომდე საქართველოში 10 მილიონამდე ტურისტის შემოსვლა იყო ნავარაუდევი, ხოლო 50 000 ტურისტის შემოსვლა ქვეყნის ეკონომიკისთვის ზღვაში წვეთი იქნება და მინიმუმ ერთი პროცენტის დაინფიცირებამაც კი შეიძლება მნიშვნელოვანი ეპიდაფეთქება გამოიწვიოს.
„ჩვენ დაახლოებით 10 მილიონ ტურისტს ველოდებოდით წელს, 50 000 ტურისტი რომ შემოვიდეს წლის ბოლომდე, ეს პრაქტიკულად ზღვაში წვეთია ჩვენი ეკონომიკისთვის, მათი 1 პროცენტი რომ მაინც დაინფიცირდეს, ამან საკმაოდ სერიოზული ეპიდაფეთქება შეიძლება გამოიწვიოს. ამიტომ რამდენადაც პარადოქსული არ უნდა მოგეჩვენოთ, ამ შემთხვევაში რისკი და სიკეთე ვერ ბალანსდება.
ნიშნავს ეს იმას თუ არა, რომ ჩვენ საზღვარს არ გავხსნით არავისთან? – არ ნიშნავს. ეს ნიშნავს, რომ სიფრთხილით მოვეკიდებით და შევეცდებით ქვეყნები შეირჩეს სწორად. ასევე მიმოსვლის ისეთი წესი დადგინდეს, რომ პირველ რიგში ავიცილოთ ეპიდემიოლოგიური აფეთქება და მეორე ხელი შევუწყოთ ქვეყნის ტურისტული სექტორის ამუშავებას.
ეს არის ძირითადი პრინციპი, რომელიც ამ პერიოდისთვის ადეკვატურია, დარწმუნებული ვარ, შემდგომი ორი თვისთვის ეს მიდგომა სიმშვიდეს შეგვანარჩუნებინებს”, – განაცხადა ივანე მაჭავარიანმა.
ავტორი
მახო ზავრაშვილი
