“ადამიანებს გაუკვირდათ ჩემი ემოციური რეპლიკა კურდღლები რატომ დაგვიძახაო…” – გიორგი გახარია

საქართველოს პრემიერ-მინისტრმა გიორგი გახარიამ პარლამენტში გამართულ შეხვედრაზე, დასკვნით სიტყვაში აღნიშნა, რომ ქვეყანაში არსებული ეკონომიკური კრიზისის მიუხედავად, არც ერთი შეკითხვა საანგარიშო პერიოდთან დაკავშირებით არ ყოფილა „ამის მაგივრად იყო გავრილოვი, 20 ივნისი, ხორავას, კერზაიას ტრაგედიების გახსენება“:

“მთელი დღის განმავლობაში, შეიძლება ცოტა ემოციური მომენტებიც არსებობდა, თუმცა გულწრფელად მინდა გითხრათ, რომ ძირითადად, დიდწილად, მე და არა მხოლოდ მე, ჩვენი გუნდის წარმომადგენლებს, ყველას მწუხარება გვალაპარაკებდა. ადამიანებს გაუკვირდათ ჩემი ემოციური რეპლიკა კურდღლები რატომ დაგვიძახაო, როდესაც დღეს, ამ წუთში აქ არ არიან.

მძიმეა იმის აღიარება, გაცნობიერება, რომ დღეს, როცა ქვეყანაში რეალური კრიზისია, როცა ქვეყანა ებრძვის პანდემიას, როდესაც ეკონომიკური კრიზისია, როდესაც ჩვენს მოქალაქეებს ნამდვილად უჭირთ და ჩვენ ვსაუბრობთ ისევ მნიშვნელოვან თემებზე, როგორიც არის ქვეყნის უსაფრთხოება, ადამიანის უფლებები, განათლება, ეკონომიკა, არც ერთი შეკითხვა საანგარიშო პერიოდთან დაკავშირებით არ ყოფილა. კიდევ ერთხელ ვიმეორებ, ჩვენ აქ მოვედით მაშინ, როდესაც წარვადგინეთ მთავრობის გეგმა, ამ პარლამენტის წინაშე მოვედით. ეს ჩვენი მოვალეობაა, პატივს ვცემთ პარლამენტს, ჩვენს ამომრჩევლებს, მოქალაქეებს, მაგრამ არც ერთი შეკითხვა ქვეყნისთვის დღეს უმნიშვნელოვანეს საკითხებზე არ ყოფილა, ვფიქრობ, ეს უბრალოდ ტრაგიკულია, სხვა ყველაფერს რომ თავი დავანებოთ. ამის მაგივრად რა იყო – ამის მაგივრად იყო გავრილოვი, 20 ივნისი, ხორავას, კერზაიას ტრაგედიების გახსენება.

რა თქმა უნდა, ეს ყველაფერი ჩვენი ცხოვრების ნაწილია და საქართველოს თითოეულ მოქალაქეს, ოპოზიციას, მმართველს, აქვს შესაძლებლობა, ჰქონდეს თავისი სუბიექტური ან ობიექტური შეფასება, თავისუფალ ქვეყანაში ვცხოვრობთ, საბედნიეროდ. მაგრამ დღეს ჩვენი დღის წესრიგი უნდა ყოფილიყო სხვა, ყველაზე ტრაგიკული ამაში ესაა და ჩემთვის მორალურად მართლა გაუგებარია, როგორ შეიძლება კონკრეტული მოქალაქის ოჯახში დატრიალებული ტრაგედია იყოს პოლიტიკური სპეკულირების საგანი,“ – განაცხადა გიორგი გახარიამ.

ავტორი
თამთა ბარბაქაძე