„მივმართავ გერმანიის ფედერაციულ რესპუბლიკის მთავრობას გაიწვიეთ ეს სამარცხვინო ელჩი, რომელიც მუშაობს საკუთარ ბიზნესზე და ფინანსდება ბიძინა ივანიშვილის რეჟიმისგან“ – ასე გამოეხმაურა „ლეიბორისტული პარტიის“ ლიდერი შალვა ნათელაშვილი ჰუბერტ ქნირშის განცხადებას, რომელშიც ის აცხადებდა, რომ 8 მარტის შეთანხმებაში გიორგი რურუაზე არაფერი იყო ნახსენები და ამის ნახვა ნებიმისმიერ ადამიანს ძალიან მარტივად შეეძლო. შალვა ნათელაშვილის თქმით, ელჩი ფინანსდება ივანიშვილის რეჟიმისაგან და რჩება მის ერთადერთ ლობისტად:
„მიუხედავად იმისა, რომ ევროპა და ამერიკის შეერთებული შტატები ქართველი ხალხის მხარეზეა რუს ოლიგარქთან წინააღმდეგ ბრძოლაში, გერმანიის ფედერაციული რესპუბლიკის ელჩი რჩება მის ლობისტად და კორუმპირებული რეჟიმის ერთადერთ დამცველად.
ეს გახლავთ ელჩი, რომელიც ფანჯრიდან უყურებდა ერთი წლის წინ ქართველი ახალგაზრდების დარბევასა და თვალების დათხრას, ხოლო შემდეგ ამართლებდა თვალთხარია გახარიების დანაშაულებრივ მოქმედებას. ეს არის ელჩი, რომელიც ფინანსდება ივანიშვილის რეჟიმისაგან, ისევე, როგორც ადრინდელი საფრანგეთის ელჩი ერიკ ფურნიე, რომელიც გახდა ოფიციალური მილიონერი.
მივმართავ გერმანიის ფედერაციული რესპუბლიკის მთავრობას გაიწვიეთ უკან ეს სამარცხვინო ელჩი, რომელიც საკუთარ ბიზნესზე მუშაობს. თუმცა, აქვე აღვნიშნავ, რომ გერმანიას აკისრია უდიდესი ვალდებულება, რომ ჩვენ დღემდე არ გვიღებენ ნატო-ში, რის გამოც რუსეთმა გაბედა ომი და ტერიტორიების წართმევა.
ეს გახლავთ ერთ-ერთი მთავარი მიზეზი იმისა, რომ დღემდე სათანადო შეფასება არ არის მიცემული ევროპაში საქართველოს 20% ოკუპაციისთვის და კვლავ აგრძელებს ბერლინი რუსეთთან ჩახუტებას. თუ ასე უყვარდა რუსეთი ბერლინს, რაღას ატეხეთ მეორე მსოფლიო ომი და რაღაზე გაგვიწყვიტეთ 400 ათასი საჯიშე რჩეული ახალგაზრდა“, – განაცხადა შალვა ნათელაშვილმა.
ავტორი
ქეთა გაბრიაძე
