🦅 დურაჯი (Francolinus francolinus)

ველური ბუნების ეროვნული სააგენტოს მორიგი საინტერესო მასალა. ამჯერად წარმოდგენილია ერთ-ერთი გამორჩეული ფრინველი დურაჯი (Francolinus francolinus), რომელსაც ეროვნულ დონეზე საფრთხესთან მიახლოებულის (NT – Near Threatened) სტატუსი აქვს მინიჭებული:

🦅🟢 საქართველოს ბუნება უნიკალური სახეობებითაა სავსე, თუმცა ბევრი მათგანი ჩვენს განსაკუთრებულ ყურადღებას და დაცვას საჭიროებს. ერთ-ერთი ასეთი გამორჩეული ფრინველი დურაჯია (Francolinus francolinus), რომელსაც ეროვნულ დონეზე საფრთხესთან მიახლოებულის (NT – Near Threatened) სტატუსი აქვს მინიჭებული. ეს ნიშნავს, რომ თუ დღესვე არ ვიზრუნებთ მის დაცვაზე, ხვალ შესაძლოა ის გადაშენების პირას მყოფ სახეობათა შორის აღმოჩნდეს.

დურაჯი საშუალო ზომის, 220-570 გრამამდე წონის ქათმისნაირი ფრინველია, რომელსაც მკაფიოდ გამოხატული სქესობრივი დიმორფიზმი ახასიათებს დედალი და მამალი შეფერილობით საგრძნობლად განსხვავდებიან ერთმანეთისგან. მსოფლიოში ამ სახეობის გავრცელების არეალი არც ისე ვრცელია და ხმელთაშუა ზღვის აღმოსავლეთით, მცირე აზიაში, ირანში, ერაყსა და ინდოეთში გვხვდება. საქართველოში კი დურაჯის ერთადერთ თავშესაფარს და ჰაბიტატს ივრის ჭალები წარმოადგენს. იგი ძირითადად ტბებისა და მდინარეების სანაპირო ჭალებში, მშრალ სუბტროპიკებში ბინადრობს, სადაც ნაკლებია თოვლის საფარი. მისი ტიპობრივი ადგილსამყოფელი ჭალის არახშირი ბალახნარი ბუჩქნარები, ისლისა და ლელის ნაკვეთებია. საინტერესოა, რომ დურაჯი პოლიფილეტური სახეობაა და მსოფლიოში არსებული 6 ქვესახეობიდან ჩვენთან მხოლოდ ერთი Francolinus francolinus francolinus გვხვდება.

ამ ფრინველების შეწყვილების პერიოდი აპრილში იწყება, ბუდობას კი მაისის შუა პერიოდიდან უდგებიან. ბუდეს მიწაზე იშენებენ და საშუალოდ 7-12 კვერცხს დებენ. 18-20 დღის ინკუბაციის შემდეგ იჩეკებიან წიწილები, რომლებიც სქესმწიფობას უკვე ერთი წლის ასაკში აღწევენ.