ავსტრიის დედაქალაქ ვენაში პოლიტიკური ჯგუფის ALDE-ს ყრილობა მიმდინარეობს, სადაც საქართველოს შესახებ რეზოლუციის დამტკიცებაა დაგეგმილი. ყრილობაში მონაწილეობას იღებს “სტრატეგია აღმაშენებლის” თავმჯდომარე, გიორგი ვაშაძე.
ოპოზიციონერმა ლიდერმა, ტვ “პირველთან” კომენტარში პოლიტიკური შეფასებები და განმარტებები გააკეთა ALDE-ს პოზიციას დაკავშირებით საქართველოს მოქალაქეებისთვის უვიზო მიმოსვლის საკითხთან მიმართებით:
“გასულ წელს, იმის ნაცვლად, რომ აქ ვყოფილიყავით მე და ზურა [ჯაფარიძე], მაგალითად, ჩვენი აუდიოფაილი იყო ციხიდან გამოგზავნილი. დღეს ელენე ხოშტარია, რომელიც ასევე [პოლიტიკური ჯგუფ] ALDE-ს წევრი პარტიის თავმჯდომარეა, ციხეშია და ჯანმრთელობის მძიმე პრობლემები აქვს. პაატა მანჯგალაძე, ჩვენი პარტიის გენერალური მდივანი, არის საპატიმროში – ეს ყველამ იცის.
ერთი რამე, რაზეც არის აქ საუბარი, რა ქმედითი ნაბიჯები შეიძლება გადაიდგას ევროპის მხრიდან, რომ საქართველომ დააღწიოს ამ უბედურებას თავი.
რეზოლუციაში შეტანილია ძალიან მნიშვნელოვანი გზავნილი, რომ ALDE ეწინააღმდეგება უვიზო მიმოსვლა შეჩერდეს მთლიანად საქართველოს მოქალაქეებისთვის და თუ რამე, უნდა იყოს მხოლოდ და მხოლოდ მიზნობრივი ნაბიჯები გადადგმული. კიდევ ერთხელ ხაზს ვუსვამ, რომ ALDE-მ, სიდიდით მეორე პოლიტიკურმა ოჯახმა, ჩვენი მუშაობის შედეგად, მკაფიოდ ჩამოაყალიბა პოზიცია, რომ წინააღმდეგია უვიზო მიმოსვლა შეუჩერდეს საქართველოს მოქალაქეებს“, – განაცხადა გიორგი ვაშაძემ.
