8 მარტის შეთანხმებისა და ოპოზიციონერი ლიდერების შეწყალების თაობაზე დაწყებულ პოლემიკას სოციალურ ქსელში ეხმიანება „პატრიოტთა ალიანსის“ გენერალური მდივანი, პარლამენტის ვიცე-სპიკერი ირმა ინაშვილი. მისი აზრით წინა და მოქმედი ხელისუფლება კოორდინირებულად მოქმედებენ და შესაძლოა მომავალში კოალიციური მთავრობაც შექმნან:
“იცოდნენ, მაგრამ ვითომ არ იცოდნენ! გარიგდნენ, მაგრამ ვითომ არ გარიგებულან! გიყურებენ, არ რცხვენიათ, უნიჭოდ ცრუობენ და ჰგონიათ, რომ ტყუვდები.
სწორედ ეს ახასიათებს პროვინციალიზმს – ურცხვი მანევრირება, ყველაფრისმკადრებლობა და მერე ამ ურცხვობის გამართლება. აქ არავის უწითლდება ლოყა სირცხვილისგან. აქ საჭირო არაა სირცხვილი.
მაგრამ ეს ჯერ კიდევ არაა გარიგების საეტაპო ნაწილი. ბოლო კადრში ცდილობენ იხილოთ წინა და მოქმედი ხელისუფლებების შერწყმული მმართველობა… და თან, დაგარწმუნონ, რომ არაფერი გაუყალბებიათ, თქვენ თავად გააკეთეთ, თურმე, ამგვარი არჩევანი.
ვიმეორებ: “ქართული ოცნების” მხარდაჭერა დღეს ნიშნავს, რომ შენ მხარს უჭერ ოცნებისა და წინა რეჟიმის (ორივე ჯგუფს ვგულისხმობ) შესაძლო კოალიციურ მმართველობას.
დამიჯერეთ, ტყუილად არ ვამბობ, რასაც ვამბობ. თუ არ გინდათ, რომ ეს თეორია (რომელიც გარიგების საკვანძო მიზანია) პრაქტიკულად განხორციელებული იხილოთ, გამოფხიზლდით! გაერთიანდით ჩვენთან, ჩვენს გარშემო!!!
ჯერ აქედან დავიწყოთ, გამოფხიზლებიდან,” – წერს ფეისბუქის პირად გვერდზე ირმა ინაშვილი.
