“ქრონიკა +”-ის მთავარი რედაქტორის, ელისო კილაძის სასამართლო პროცესზე პროკურორმა სხდომის დახურულ ფორმატში წარმართვის შუამდგომლობა დააყენა, რასაც ბრალდებული არ ეთანხმება და თავის პოზიციას აფიქსირებს შუამდგომლობასთან დაკავშირებით, რაც სოციალურ ქსელებში გავრცელდა:
“რატომ უნდა დაიხუროს სხდომა? რას ვმალავ ჩემი კოლეგებისგან და ჩემი თანამშრომლებისგან? დარბაზში ჩემი კოლეგები და თანამშრომლები სხედან და მე მინდა, რომ ამ ადამიანებს პირდაპირ და ღიად ველაპარაკო!
მესმის ყველაფერი, რომ ეს საჯაროობა თქვენს ინტერესებში არ შედის, მაგრამ შედის ჩემს ინტერესებში იმიტომ, რომ მე ამ რეპუტაციით, ამ ქვეყანაში ცხოვრებას არ ვაპირებ, ისევე როგორც ამ საქმეში არანაირ საპროცესო გარიგებაზე, არანაირ აღიარებაზე და კომპრომისზე არ წავალ, რადგანაც სასწორზე დევს ჩემი, როგორც ჟურნალისტის, სახელი და გვარი და მე ამ ცხოვრებაში არაფერი მეტი არ შემიქმნია.
არ ვეთანხმები ამ შუამდგომლობას, მინდა საჯაროობა“, – განაცხადა ელისო კილაძემ.
