ვადამდელი არჩევნების შესაძლო დანიშვნის თემას ეხმაურება ქართველი პოლიტიკოსი, ეროვნულ დემოკრატიული პარტიის ყოფილი წევრი, ყოფილი დეპუტატი ირინა სარიშვილი, კონკრეტულ ფაქტებზე ამახვილებს ყურადღებას და შესაბამისი განმარტებებით თუ შეთავაზებებით ოპოზიციურ პარტიებს მიმართავს:
“ყველაზე დიდი ელექტორატის მქონე პარტიებს აუქმებენ; დანარჩენებს კითხვის ნიშნის ქვეშ ტოვებენ;
ემიგრანტებს ფაქტობრივად ართმევენ არჩევნებში მონაწილეობის მიღების საშუალებას;
ქმნიან დოკუმენტებს, რომლითაც რუსეთი, როგორც ოკუპანტი, თავისუფლდება პასუხისმგებლობისგან და ბოდიშს უხდიან სეპარატისტებს და ოკუპანტებს…
აღარაფერს ვამბობ უკანონო დაპატიმრებებზე; განუკითხაობაზე ყველგან და ყველაფერში;
და აი ამ რეჟიმისგან მოვითხოვთ რომ მანვე დანიშნოს და ჩაატაროს თუნდაც რიგგარეშე არჩევნები?!
რუსთაველზე მყოფ აქტივისტებს შეიძლება არ ესმოდეთ, მაგრამ თქვენ ხომ გესმით, პოლიტიკოსებო?! ვის ატყუებთ – ჩვენ თუ საკუთარ თავებს?!
ერთხელ მაინც დადექით ყველა ერთად და ის მაინც მოახერხეთ რომ ერთობლივი განცხადებით თხოვნით მიმართოთ არა რეჟიმს, არამედ საერთაშორისო ორგანიზაციებს (ევროკავშირი, ეუთო, გაერო) რომ მათი სრული საარჩევნო მანდატით ჩატარდეს არჩევნები. თქვენ ხომ იცით რომ ამის პრეცედენტები არსებობს! ეს მაინც გააკეთეთ, ოღონდ არა ცალ-ცალკე, მხოლოდ ერთად, ყველამ ერთად!
მოწყდით ცოტა ხნით ერთმანეთთან ქიშპს, ილუზიებს! ნუ კარგავთ დროს საარჩევნო სიებზე ფიქრში! თავზე გადაგახევთ ეს რეჟიმი მაგ სიებს!
იმოქმედეთ! რამე გააკეთეთ ერთად!” – აცხადებს ირინა სარიშვილი.
