ერთი და ორ შვილიანი ოჯახების დახმარებისათვის რესურსის გამოყოფისაკენ მოუწოდებს საქართველოს პრემიერ-მინისტრს გიორგი გახარიას და თბილისის მერს კახა კალაძეს პარტია ,,ახალი საქართველოს” სოციალური მიმართულების ხელმძღვანელი თეონა ჭალიძე და აღნიშნავს, რომ თვეებია სახელმწიფო შემწეობას არ იღებენ ის ოჯახები, რომელთაც დახმარება სჭირდებათ.
თეონა ჭალიძე გაკვირვებას გამოხატავს იმის გამო, თუ რატომ არ იღებენ ის ერთშვილიანი და ორშვილიანი ოჯახები სახელმწიფო შემწეობას, როცა მათ ყველანაირი რესურსი ამოწურული აქვთ და კითხულობს – რა დააშავეს მათ შვილებმა?! ამასთან პარტიის სოციალური მიმართულების ხელმძღვანელს მიუღებლად მიაჩნია ბავშვების მსგავსი სახის დახარისხება:
„მივმართავ გახარიას და კალაძეს, – ერთი შვილის და ორი შვილის მშობლებმა რა ქნან? თქვენ შვილებს არ შიათ და სხვისმა შვილებმა რა დააშავეს?! როცა მათ შვილებს შიათ, რა უთხრან? სახელმწიფო მარტო სამ და მეტ შვილიან ოჯახებს ეხმარება და თქვენ არ ადარდებთო?!
ძალიან გამწარებული დედები მწერენ, პროდუქტი მაინც დაურიგეთ ყველა ბავშვიან ოჯახს, ყველანაირი რესურსი ამოწურული აქვთ ოჯახებს. თვეებია უკვე საარსებო შემწეობასაც ვერ იღებს მოშლილი სოციალური მომსახურების სააგენტოს დამსახურებით ბევრი მათგანი.
არ შეიძლება ბავშვების დახარისხება, გამოინახოს რესურსი ერთი და ორ შვილიანი ოჯახებისთვისაც!” – აღნიშნავს თეონა ჭალიძე.
შეგახსენებთ, რომ საქართველოს პრემიერ-მინისტრმა გიორგი გახარიამ 24 აპრილს საქართველოს სოციალურ-ეკონომიკური ანტიკრიზისული გეგმა წარადგინა, რომლის მიხედვითაც 6 თვეში საშუალოდ 600-ლარიან დახმარებას მიიღებენ ოჯახები, რომელთა სარეიტინგო ქულა 0-დან 100 000-მდეა და ჰყავთ 3 და მეტი 16-წლამდე ასაკის შვილი. რითიც ისარგებლებს დაახლოებით 21 000 ოჯახი და გამოყოფილია 13 მილიონი ლარი.
ავტორი
თამთა ასლანიშვილი