სოციალურ ქსელში გამოქვეყნებულ პოსტში, საპროტესტო აქტივობების, რუსთაველის გამზირზე მიმდინარე პროტესტის მნიშვნელობაზე საუბრობს შს სამინისტროს ყოფილი მაღალი თანამდებობის პირი, რონდელის ფონდის უფროსი ანალიტიკოსი, პოლიტიკის ექსპერტი შოთა უტიაშვილი:
“მეგობრებთან დიდი დისკუსია გვქონდა იმაზე, აქვს თუ არა აზრი რუსთაველის პროტესტის გაგრძელებას, როდესაც იგი არსებით საფრთხეს რეჟიმს არ უქმნის და შანსი, რომ იგი ისევ მასობრივ გამოსვლებში გადაიზარდოს, არცთუ ისე დიდია. რაკი ასეთი დისკუსია, ალბათ, სხვაგანაც მიმდინარეობს, ვიტყვი ჩემს მოკრძალებულ აზრსაც.
აუცილებად აქვს და არა მხოლოდ იმიტომ, რომ წინასწარ დანებებით არავის არაფერი მოუგია.
მთავარი ისაა, რომ ჩვენ ვცხოვრობთ არასტაბილური, დეგრადირებადი რეჟიმის პირობებში, რომელშიც ნებისმიერი ხვალინდელი დღე უარესი იქნება დღევანდელზე, ნებისმიერი ახალმიღებული კანონი უარესი იქნება არსებულზე, ნებისმიერი ახალმოსული პოლიციელი უფრო სასტიკი იქნება წასულზე, ნებისმიერი ახალდანიშნული მინისტრი უფრო კორუმპირებული და არაკომპეტენტური იქნება, ვიდრე მისი წინამორბედი, ყოველ შემდეგ დღეს საქართველო უფრო იზოლირებული იქნება, ვიდრე წინა დღეს იყო.
რასაც პროტესტი აკეთებს, ისაა რომ ამ დეგრადაციას აჩქარებს. ამ ქვეყნის ხსნა კი რეჟიმის ბოლომდე ჩალპობაშია. თანაც, სწრაფი დეგრადაცია “მოხარშული ბაყაყის ეფექტის” თავიდაც აცილებაში დაგვეხმარება“, – წერს შოთა უტიაშვილი.
