„დღეს, პარტიის „გახარია – საქართველოსთვის“ წევრები პლენარულ სხდომათა დარბაზში იმყოფებიან და საკუთარი სადეპუტატო უფლებამოსილების შესრულებას შეუდგნენ, რაც მნიშვნელოვანი და მისასალმებელია“, – განაცხადა პარლამენტის თავმჯდომარემ შალვა პაპუაშვილმა პლენარულ სხდომაზე.
მისივე თქმით, ეს ის გაკვეთილია, რომელიც საქართველოს სხვადასხვა მოწვევის პარლამენტს მრავალჯერ აქვს გავლილი.
„2016 წელს არჩევნების შედეგების არაღიარების მცდელობა იყო, თუმცა ბოლოს ყველას მოუწია არჩევნებისა და ხალხის ნების აღიარება და პარლამენტში საქმიანობის დაწყება.
2020 წელსაც ჩვენ ვნახეთ მცდელობა არ ეღიარებინათ არჩევნების შედეგები. ამის შემდეგ, ზოგიერთს ნახევარი წელი, ზოგიერთ კი 1 წელი დასჭირდა იმის გასააზრებლად, რომ ხალხის ნებას ვერ გაექცეოდა და ბოლოს შეუდგნენ სადეპუტატო უფლებამოსილების შესრულებას.
2024 წელსაც ჩვენ ვიხილეთ იგივე მცდელობა – თვალი აერიდებინათ რეალობისთვის და ხალხის ნებისთვის. მისასალმებელია, რომ მართალია დაგვიანებით, ერთი წლის თავზე, თუმცა ერთმა პოლიტიკურმა პარტიამ აღიარა ხალხის ნება, აღიარა დემოკრატია და სადეპუტატო უფლებამოსილების შესრულებას შეუდგა“, – აღნიშნა პარლამენტის თავმჯდომარემ.
შალვა პაპუაშვილის განცხადებით, სამწუხაროა, რომ ზოგიერთმა პარტიამ უკანდასახევი ხიდები დაწვა და შეიძლება დღეს ძალიან უნდოდეთ პარლამენტში ყოფნა, თუმცა ამის შესაძლებლობა თავადვე მოუსპეს უპირველეს ყოვლისა, საკუთარ ამომრჩევლებს, რომ მათი ხმა პარლამენტში გაჟღერდეს.
„ამიტომ, მივესალმები ჩვენს კოლეგებს, რომლებიც დღეს საპარლამენტო საქმიანობას შემოუერთდნენ. თქვენს წინ, დოკუმენტაციასთან ერთად განთავსებულია დეპუტატის ფიცი, რომლის დადება დაგაგვიანდათ, თუმცა „სჯობს გვიან, ვიდრე არასდროს“, ამიტომ გთხოვთ ამ ფიცს ხელი მოაწეროთ და გისურვებთ, რომ ამ ფიცის ერთგულად შეგესრულებინოთ თქვენი სადეპუტატო უფლებამოსილება“, – განაცხადა პარლამენტის თავმჯდომარემ.
ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს
