“პიჯაკების საქმე“, რომელიც ჩვენი ქვეყნის ისტორიაში სამარცხვინო საქმედ შევიდა, გადაწყვეტილება ჯერ კიდევ ივლისში უნდა გამოცხადებულიყო, მაგრამ გადმოიტანეს 4 ოქტომბრამდე რამდენიმე დღით ადრე, რადგან ივანიშვილს ყველაზე მეტად სწორედ 4 ოქტომბერი აშინებს,“ – ასე ეხმაურება „ნაციონალური მოძრაობის“ გენერალური მდივნის მოადგილე, ირაკლი ფავლენიშვილი მიხეილ სააკაშვილის საქმეზე განაჩენის გამოცხადებას და 4 ოქტომბრის საპროტესტო აქციაზე ამახვილებს ყურადღებას:
“ზოგადად ამ პროცესების ჩანიშვნის მიზანი არის ძალიან მარტივი. ჯერ კიდევ ივლისში უნდა გამოცხადებულიყო განაჩენი, მაგრამ გადმოატანინეს 4 ოქტომბრამდე რამდენიმე დღით ადრე, რადგან 4 ოქტომბერი აშინებს ივანიშვილს ყველაზე მეტად.
რაც შეეხება ზოგადად ამ საქმეს, ყველამ ვიცით, რომ ეს არის შეკერილი საქმეები და ცივილიზებულ სამყაროში არცერთი ქვეყანა არ აღიარებს ამ შეკერილ საქმეებს, მათ შორის ჩვენ ვიცით, რომ ის საქმე, რომელზეც დღეს გამოცხადდება განაჩენი თემურ ჯანაშიასაც ეხება, ეს საქმე გახმაურებულია როგორც “პიჯაკების საქმე”, ასე შევიდა ჩვენი ქვეყნის ისტორიაში.
არავისთან ეს საქმე არ არის დაკავშირებული რა ბრალდების გაჟღერებაც ხდებოდა პროკურატურის მხრიდან, პირიქით, დაკავშირებულია იმასთან, რომ ადამიანი, პრეზიდენტი, რომელიც ხარჯების გაწევას ახდენდა საკუთარი ქვეყნის იმიჯისთვის, საკუთარი ქვეყნის საგარეო პოლიტიკური მდგომარეობისთვის ხარჯავდა; მხილებულია იმ ხარჯებში, რომელიც უკავშირდება აშშ-ს პრეზიდენტს, სხვა მაღალი თანამდებობის პირებს, ანუ თავისი უფლებამოსილების გამოყენების გამო არის შეკერილი ეს საქმეები და ყველა ამ შემთხვევაში სახეზე გვაქვს არა კონკრეტული დანაშაულები, არამედ კონკრეტული ადამიანის მიერ თავისი უფლებამოსილების ფარგლებში მიღებული გადაწყვეტილება”, – განაცხადა ირაკლი ფავლენიშვილმა.
ინფორმაციას “ნაციონალური მოძრაობის” პრესსამსახური ავრცელებს
