“სტრატეგია აღმაშენებლის” ერთ-ერთი ლიდერი, ნანა ტოხვაძე, განათლების სამინისტროსთან გამართულ, მასწავლებელ ნინო დათაშვილის სოლიდარობის აქციაში მიიღო მონაწილეობა.
ნანა ტოხვაძემ, სააგენტო “პარალელთან” ინტერვიუში, ქვეყანაში არსებულ უსამართლობასა და ორმაგ სტანდარტზე ისაუბრა:
“3 თვეა მასწავლებელი, ნინო დათაშვილი რეჟიმის ტყვეობაშია. ეს იმ ფონზე, რომ ყველა მოძალადე, კანონდამრღვევი და ტიტუშკა რეჟიმის სასამართლომ გაათავისუფლა.
შერჩევითი სამართალი და ოპონენტებისადმი ანგარიშსწორება ავტოკრატებისგან არ გვიკვირს, მაგრამ იქამდეც შეტოპეს, რომ ქალი პოლიტიკური პატიმრები გვყავს ქვეყანაში.
ნინო დათაშვილის სოლიდარობის აქცია გაიმართა განათლების სამინისტროსთან, სადაც ნინოს კოლეგები, აკადემიური და სამეცნიერო წრეების წარმომადგენლები აპროტესტებდნენ ქვეყანაში შექმნილ უსამართლობას და მასწავლებლის უკანონო პატიმრობას.
არც რეჟიმის სამინისტროსგან უნდა ველოდეთ იოტისოდენა რეაგირებას, მაგრამ საზოგადოებას უნდა ახსოვდეს, რომ ბუტაფორიად იქცა ყველა სახელმწიფო უწყება. რეჟიმის მორჩილ მოსამსახურედ აქციეს განათლების სფეროს წარმომადგენლები. არადა, როგორი ფუჭია განათლება, თუ ის თავისუფლებას არ ემსახურება.
თავისუფლება რეჟიმის ტყვეებს“, – აცხადებს ნანა ტოხვაძე.
