უკრაინის მთავრობის მაღალ თანამდებობაზე საქართველოს მე-3 პრეზიდენტის, მიხეილ სააკაშვილის შესაძლო დანიშვნასთან დაკავშირებით, ვოლოდიმირ ზელენსკისადმი კონკრეტული ჯგუფის მიერ გაგზავნილ წერილს ეხმიანება, პარტია “სახელმწიფო ხალხისთვის” თავმჯდომარე ნიკა მაჭუტაძე:
“უკრაინის ხელისუფლებას წერილი მისწერა “ქართულმა ინტელიგენციამ”.
1921, 1924, 1937 წლების საბედისწერო, ცინიკური ინერციაა ეს ტერმინი – სხვის ადგილზე ხელოვნურად დასმულებმა თავადვე ირწმუნეს საკუთარი უპირატესობა, გამორჩეულობა, კეთილშობილება.
საუკუნეების განმავლობაში და საუკეთესო კათედრებზე აღზრდილი ინტელექტუალური, სამხედრო, პოლიტიკური არისტოკრატიის დახვრეტილ ცხედრებსა და განდევნილ თუ ამოწყვეტილ ოჯახებზე დგას ამათი “ინტელიგენცია” სინამდვილეში.
ცალკე მათი ლექსიც მიყვარს, ტილოც, გამოკვლევაც, სპექტაკლიც, კინოც, სიმღერაც და კომპოზიციაც, მაგრამ არაფერი ისეთი საზარელი და ცინიკური არ არის, როგორც ცნება “ქართული ინტელიგენცია” – ბოლშევიკური სოციალური ინჟინერიის ადეპტები.
საბჭოთა არისტოკრატია ქართული და ევროპული არისტოკრატიის ნაცვლად.
სხვის სახელოში არიან, სხვის სეფე-გოდოლზე დგანან, სხვა ხალხის, სხვა ინდივიდუალობების, სხვა ეთიკის და სიყვარულის და თავდადების. ჩვენს ისტორიას და ცხოვრებას საბუთად, გამოსარჩლებად, კომპენსაციად რომ გამოადგება იმ ხალხის ჩამნაცვლებელ სუროგატებად ჩაიფიქრეს ბოლშევიკებმა და კიდევაც გააკეთეს,” – წერს ფეისბუქის პირად გვერდზე ნიკა მაჭუტაძე.
