განათლების ყოფილი მინისტრი, ილიას სახელმწიფო უნივერსიტეტის პროფესორი, პოლიტოლოგი გია ნოდია მამუკა ხაზარაძესა და ბადრი ჯაფარიძის შეწყალებასთან დაკავშირებით თავის პოზიციას აფიქსირებს:
“მამუკა ხაზარაძის და ბადრი ჯაფარიძის განთავისუფლება არის ძალიან ჭკვიანური (სხვა ტერმინით – “გოთ*ერნული”) ნაბიჯი საქართველოს ავტორიტარული ხელისუფლების მხრიდან.
ზოგადად, მისი დიდი წარმატებაა ოპოზიციის გახლეჩა არჩევნების ბოიკოტის მომხრეთა და მოწინააღმდეგეთა შორის; ხაზარაძის და ჯაფარიძის განთავისუფლება კიდევ უფრო აღრმავებს ამ გახლეჩას და, ობიექტურად, ამ პოლიტიკოსების დისკრედიტაციაზე მიმართული ნაბიჯია.
ბუნებრივია, მებოიკოტე ფლანგმა ჩათვალოს, რომ მათ „იყიდეს“ თავისუფლება ივანიშვილის მიმართ ლოიალობის დემონსტრირებით.
მათი მხრიდან განსაკუთრებით ჭკვიანური სვლა იქნებოდა უარის თქმა არჩევნებში მონაწილეობაზე (შესაძლო სხვა ვარიანტი: თანხმობა იმ პირობით, რომ ხელისუფლება სხვა პოლიტპატიმრებსაც შეიწყალებს – მერე რა, რომ ისინი ბოიკოტის პოზიციაზე დარჩებიან).
(სანამ ამას ვწერდი, ვნახე, რომ ბევრი სხვაც ასე ფიქრობს. ძალიან კარგი)“, – წერს გია ბოდია ფეისბუქის პირად გვერდზე.
