კორონავირუსის პრევენციისას დაშვებული შეცდომების შედეგად გამოწვეულ მძიმე სოციალურ-ეკონომიკურ მდგომარეობაზე საუბრობს და მარნეულში მომხდარ ფაქტს ეხმიანება პარტია „ახალი საქართველოს“ თავმჯდომარე გიორგი ვაშაძე. ოპოზიციონერი ლიდერის განმარტებით, მთავრობას რომ ეხელმძღვანელა მის მიერ წარდგენილი ანტიკრიზისული გეგმით, რომელიც ერთადერთი დაწერილი გეგმაა, შეზღუდვების მოხსნა მალე დაიწყებოდა, ქვეყნის ეკონომიკური მდგომარეობა თუ ქართული ბიზნესი ასე განულებული არ იქნებოდა, ხოლო რომ შიმშილი არის ისეთი რამ, რომელიც ხალხს გამოიყვანს ქუჩაში და ამ პროცესის გაკონტროლება რთული იქნება:
„ხელთ მაქვს გეგმა, რომელიც ერთი თვის წინ გამოგიგზავნეთ. ეს არის ერთადერთი დაწერილი გეგმა კორონავირუსის დამარცხებისათვის, რომელიც სწორედ მასობრივ ტესტირებაზე დგას, ამ გეგმით თქვენ რომ გეხელმძღვანელათ დღეს არანაირი შეზღუდვები აღარ იქნებოდა ქვეყანაში. მაგრამ რა მდგომარეობაში ვართ ახლა? – ვართ იმ მდგომარეობაში, რომ თქვენ გაანულეთ საქართველოს ეკონომიკა; თქვენ გაანულეთ ქართული ბიზნესი; თქვენ უმუშევრად დატოვეთ ასობით ათასი ადამიანი; თქვენ შიმშილისთვის გაწირეთ საქართველოს მოსახლეობა;
გეკითხებით როდემდე უნდა გაგრძელდეს ეს არაპროფესიონალიზმი?!
გეკითხებით როდემდე უნდა გააგრძელოთ მხოლოდ და მხოლოდ ყოველდღიურად რეაგირება და ტელევიზიებთან კეკლუცი ამ პრობლემებით?!
გეკითხებით როდემდე უნდა გაგრძელდეს თქვენს მიერ პოლიტიკური ქულების ჩაწერა?!
ვერ ხედავთ რა ხდება მარნეულში?! შეხედეთ უბრალოდ ხალხი რა მდგომარეობაშია. ხალხი მშიერია. თქვენ კი მხოლოდ პარასკევს უნდა გვითხრათ რას აჭმევთ ხალხს.
2 მილიარდი ლარიო, რომ გამოვიდა გახარია 1 აპრილს და გვითხრა, რომ 2 მილიარდ ლარს დავხარჯავო სად არის ეს 2 მილიარდი ლარი?!
თქვენი დანაშაულებრივი სიჯიუტის გამო ტესტები არ გვაქვს; კარანტინი გრძელდება; შეზღუდვები გრძელდება და ადამიანებს საკვებით არანაირი დახმარება არ გაუწიეთ. გინდა ვაუჩერი იყოს გინდა თანხა ჩაურიცხეთ.
რა გგონიათ, რომ თქვენსავით უზრუნველყოფილია ყველა, რომ ძარცვეთ ეს ქვეყანა და გაისქელეთ ჯიბეები?! რამდენიც გინდათ ფული გაქვთ იმისთვის, რომ ჭამოთ, დალიოთ და ყველაფერი გქონდეთ თქვენ და თქვენი ოჯახის წევრებს და ხალხმა რა გააკეთოს?! გეკითხებით შიმშილი არის ისეთი რამ, რომელიც ხალხს გამოიყვანს ქუჩაში და თქვენ და ჩვენ ვეღარ გავაჩერებთ ამ პროცესს.
როდემდე უნდა გაგრძელდეს ეს ყველაფერი?! როდემდე უნდა ვუსმინოთ ამ თქვენს, მართლაც, ჯიუტ არაპროფესიონალურ დამოკიდებულებას?!
კარგი ჩვენ არ გვეკითხებით პოლიტიკურ ოპონენტებს, სპეციალისტები მაინც მოიყვანეთ. მსოფლიო სავალუტო ფონდს მაინც მოუსმინეთ. რატომ გამოაქვეყნა სავალუტო ფონდმა ფინანსური დახმარება?! იმიტომ რომ თქვენ წელავთ ამ პროცესს და მათი მოქმედების ალგორითმშია, რომ თუ ფინანსურად არ დაეხმარებით მშიერად დარჩენილ ხალხს, ამ ხალხს ვერ გააჩერებთ და ამას გვიჩვენებს დღეს ჩვენ მარნეული. თქვენ რას აკეთებთ საპირისპიროდ? ზიხართ კაბინეტებში აჩვენებთ ხალხს, რომ ვითომ რაღაცას აკეთებთ. რეალურად არაფრით ხართ დაკავებულები,“ – განაცხადა გიორგი ვაშაძემ.
ავტორი
თამთა ასლანიშვილი