საგანგებო მდგომარეობის გაგრძელებას ეხმიანება პარტია „ახალი საქართველოს“ თავმჯდომარე და აცხადებს, რომ სიჯიუტის გამო, რომელმაც საგანგებო მდგომარეობისა და კარანტინის რეჟიმების გახანგრძლივება გამოიწვია დანაშაულებრივია და გამოსავალი მასობრივ ტესტირებაშია. გიორგი ვაშაძის აზრით ხელისუფლების დანაშაულებრივი სიჯიუტის გამო საქართველოში ჯანმრთელობის პრობლემასთან ერთად, საზოგადოება შიმშილის პრობლემის წინაშე დგას:
„სამწუხაროდ, ჩვენ ვართ დანაშაულებრივი სიჯიუტის მხვერპლი.
დიახ, დანაშაულებრივი სიჯიუტეა, რომ დღემდე ქვეყანაში არ გვაქვს მასობრივი ტესტირება.
დიახ, დანაშაულებრივი სიჯიუტეა, რომ ამ მასობრივი ტესტირების არქონის გამო, გვიწევს და გვიწევს საგანგებო მდგომარეობისა და კარანტინის რეჟიმის გაგრძელება.
დიახ, დანაშაულებრივი სიჯიუტის გამო, ჩვენ გვიწევს უაზრო შეზღუდვების დაწესება ქვყანაში, მანქანებით გადაადგილებასთან დაკავშირებით და ასე შემდეგ.
სწორედ ამ დანაშაულებრივი სიჯიუტის გამო, ჯანმრთელობის პრობლემასთან ერთად, შიმშილის პრობლემის წინაშე დგას უკვე დღეს საზოგადოება. სწორედ ამ დანაშაულებრივი სიჯიუტის გამო, ჩვენ არ გვაქვს არანაირი გეგმა.
მთავრობა მიდის პარლამენტში ითხოვს საგანგებო მდგომარეობის გაგრძელებას და ამბობს, რომ მერე მოგიტანთ გეგმას, თუ რისთვის ვითხოვ საგაგნგებო მდგომარეობის გაგრძელებასო.
მე შეკითხვა მაქვს მთავრობის თითოეულ წევრთან. გეკითხებით რა შეიცვლება ორშაბათს დღევანდელისაგან განსხვავებით?! როცა მოიხსნება მანქანებზე შეზღუდვა?! ან რა შეიცვლება 22 მაისს?! თქვენ რა მართლა გგონიათ, რომ კორონავირუსი თვითონ დამარცხდება? თუ ჯოგურ იმუნიტეტს გამოვიმუშავებთ ჩვენ ყველა და ამით გადავლახავთ კორონავირუსს?!
სანამ მასობრივი ტესტირება არ დაიწყება ქვეყანაში გამორიცხულია რაიმე ნაბიჯი გადაიდგას. თვენახევრის წინ, როცა ჩვენ დავინახეთ ეს ფუნდამენტური შეცდომა, რომელსაც თქვენ უშვებდით მასობრივ ტესტირებასთან დაკავშირებით, ავტეხეთ ამაზე განგაში. თქვენგან კი რა იყო პასუხი?! – მასობრივი ტესტირება პანაცეა არ არისო. დიახ, პანაცეაა, – პანაცეაა მასობრივი ტესტირება და ახლა საქართველოში 100 ათასი ტესტი მაინც უნდა იყოს ჩატარებული და იქნებოდა გახსნილი მაღაზიები, ბიზნესი და ა.შ. მაგრამ ამის სანაცვლოდ რა მივიღეთ?! თქვენგან ჯიუტი მტკიცება, რომ არაფერში ეს არ არის საჭირო,“ – აცხადებს გიორგი ვაშაძე.
ავტორი
თამთა ასლანიშვილი
