„ახალი საქართველოს“ თავმჯდომარე, გიორგი ვაშაძე კიდევ ერთხელ მოუწოდებს ხელისუფლებას დაარღვიოს დუმილი და აღდგომის დღესასწაულთან დაკავშირებით, მოსახლეობის უსაფრთხოებიდან გამომდინარე, გამოაცხადოს კონკრეტული მოქმედების გეგმა. ოპოზიციონერი ლიდერი მთავრობისგან მოითხოვს, ამ რთულ ვითარებაში, იფიქრონ ხალხის ჯანმრთელობაზე და არა პოლიტიკური დივიდენდების მიღებაზე:
„აღდგომის ბრწყინვალე დღესასწაულთან დაკავშირებით: წინ დიდი ხუთშაბათია, წითელი პარასკევი, აღდგომის ბრწყინვალე დღესასწაული და ჯერ კიდევ არ ვიცით რა არის ხელისუფლების გადაწყვეტილება ამასთან დაკავშირებით, რასაც მხოლოდ და მხოლოდ ორი ახსნა შეიძლება ჰქონდეს. პირველი – ჩვენი საზოგადოების უსაფრთხოებიდან გამომდინარე არსებული მოთხოვნები „ქართულმა ოცნებამ“ გაასაღოს ქრისტიანული სარწმუნოების მორწმუნე მრევლის წინააღმდეგ ბრძოლად და მეორე – თუ ეს ყველაფერი გამოიწვევს ეპიდაფეთქებას ხელი გაიშვიროს ეკლესიისაკენ და მრევლის დაუდევრობას დააბრალონ ყველაფერი.
მეგობრებო, ეს დანაშაულია! ეს დანაშაულებრივი ქმედება არის ნებისმიერი პოლიტიკური ძალის მხრიდან, დანაშაულია პოლიტდივიდენდების მიღებაზე ფიქრი, ისევე როგორც დანაშაულია ფინანსური დივიდენდების მიღებაზე ფიქრი. ამ დროს კი გაჩუმება და დუმილი დანაშაულია. ეს არის მართლაც წარმოუდგენელი პოლიტიკური სიბინძურე, რასთანაც გვაქვს საქმე!
ჩვენ, მიჩვეული ვართ „ქართული ოცნების“ მხრიდან, რომ ისინი ატეხენ ამბავს ეკლესიასთან დაკავშირებით, ძირითადი მოქმედი პირები არიან, მერე განზე გაიწევიან, შემდეგ უკვე დაიწყება საზოგადოებაში დისკუსია, ამ საკითხებთან დაკავშირებით და ისევ უნდათ, რომ ხელი მოითბონ.
ჩვენ ვართ ძალიან მძიმე ვითარებაში. საქართველო არის ეპიდაფეთქების ზღვარზე და მივმართავ ხელისუფლებას – დაასრულეთ ეს პოლიტიკური სიბინძურე, რომელსაც ახლა თქვენ ეწევით, დაუყოვნებლივ გამოდით და გვითხარით რა არის მოქმედების წესი აღდგომის ბრწყინვალე დღესასწაულთან დაკავშირებით. დღევანდელი ციფრებიც მიუთითებს, ახალი შემთხვევების ზრდაა, რომ ჩვენ ვართ ძალიან მძიმე ვითარებაში და ამ დროს დანაშაულია თქვენი დუმილი, ეს არის პოლიტიკური სიბინძურე. თქვენ ახლა ფიქრობთ პოლიტიკური დივიდენდების მიღებაზე და არა ხალხის ჯანმრთელობაზე,“ – აცხადებს გიორგი ვაშაძე.
ავტორი
თამთა ასლანიშვილი