პროექტი „ტელესკოლა“ 30 მარტს დაიწყო, რომელიც საქართველოს განათლების, მეცნიერების, კულტურისა და სპორტის სამინისტროსა და საქართველოს პირველი არხის ერთობლივი პროექტია. ამ დრომდე გადაიცემოდა მხოლოდ ქართულ ენაზე გაკვეთილები და როგორც მინისტრმა მიხეილ ჩხენკელმა განაცხადა ეთნიკური უმცირესობებისათვის ეტაპობრივად დაემატებოდა აზებაიჯანულ და სომხურ ენებზე გაკვეთილები. დღეიდან კი ეთნიკური უმცირესობები შეძლებენ მათ ენაზე მოისმინოს გაკვეთილები. ინფორმაციას ამის შესახებ განათლებისა და მეცნიერების სამინისტრო ავრცელებს.
„13 აპრილიდან ეთნიკური უმცირესობების მოსწავლეებისთვის სომხურ და აზერბაიჯანულ ენებზე მათემატიკის, ბუნების, ბიოლოგიის, ასევე სომხურისა და აზერბაიჯანულის, როგორც მშობლიური ენების, ტელე-გაკვეთილები დაიწყება. სატელევიზიო გაკვეთილები განკუთვნილი იქნება ყველა კლასის მოსწავლისთვის. ამასთანავე მნიშვნელოვანია, რომ აბიტურიენტებისთვის ზოგადი უნარების ტელე გაკვეთილები ჩატარდება,“ – აღნიშნულია განათლების სამინისტროს განცხადებაში.
„ტელესკოლა“ საზოგადოებრივი მაუწყებლის“პირველი არხი – განათლება” (ყოფილი მეორე არხი) ეთერით მოსწავლეებისთვის გადაიცემა.
პროექტ „ტელესკოლის“ მიზანი იყო ყველა მოსწავლეს, განურჩევლად იმისა, აქვს თუ არა ინტერნეტთან წვდომა, საშუალება ჰქონოდათ მოესმინათ საინტერესო გაკვეთილები ყველა საგანში. „ტელესკოლის“ ფორმატს მორგებულ გაკვეთილებს გამოცდილი პედაგოგები ატარებენ.
„აღსანიშნავია, რომ ეკონომიკური განვითარებისა და თანამშრომლობის საერთაშორისო ორგანიზაციის მიერ (The Organisation for Economic Co-operation and Development – OECD) COVID-19-ის 2020 წლის პანდემიით განათლების სფეროში შექმნილი გამოწვევების დასაძლევად გამოქვეყნებულ ანგარიშში საქართველოს მთავრობის მიერ განათლების მიღების უწყვეტი პროცესის უზრუნველსაყოფად გადადგმული ნაბიჯები და მათ შორის პროექტი „ტელესკოლა“ ერთ-ერთ საუკეთესო ნიმუშად არის შეფასებული,“ – ნათქვამია განცხადებაში.
