ამერიკიდან საქართველოში 79 ქართველი მოსწავლე დაბრუნდა, ასევე მათთან ერთად სომხეთის 35 მოსწავლე იმყოფებოდა. ინფორმაციას საქართველოს მთავრობის ადმინისტრაცია ავრცელებს. მოსწავლეები 14 დღიან სავალდებულო კარანტინს გაივლიან და ისე დაბრუნდებიან თავიანთ ოჯახებში. ხოლო ის მოსწავლეები, რომლებიც სომხეთიდან იყვნენ, თბილისის საერთაშორისო აეროპორტიდან სომხეთში გაემგზავრნენ:
„79 ქართველი მოსწავლე, რომლებიც ამერიკაში იმყოფებოდნენ, უკვე საქართველოში არიან. მათი დაბრუნება შესაძლებელი გახდა საქართველოსა და აშშ-ის მთავრობათა თანამშრომლობის შედეგად.
მოსწავლეების ყატარის დედაქალაქ დოჰაში ჩაყვანა ამერიკულმა მხარემ, ხოლო დოჰადან სპეცრეისით თბილისამდე, საქართველოს მთავრობამ უზრუნველყო.
ქართველ მოსწავლეებთან ერთად თბილისში ჩამოვიდა 35 მოსწავლე სომხეთიდან, რომლებიც ქართველ თანატოლებთან ერთად ამერიკაში იმყოფებოდნენ,“ – ნათქვამია საქართველოს მთავრობის ადმინისტრაციის მიერ გავრცელებულ განცხადებაში.
ქართველმა მოსწავლეებმა თბილისის საერთაშორისო აეროპორტში გაიარეს სავალდებულო თერმოსკრინინგი და ჯანდაცვის სამინისტროს რეკომენდაციების სრული დაცვით გაემგზავრნენ საკარანტინე სასტუმროებში თბილისსა და კახეთში.
ავტორი
თამთა ასლანიშვილი
