საკოორდინაციო საბჭოს გადაწყვეტილებით ლენტეხში სრული კარანტინი ამოქმედდება, რაც კორონავირუსული ინფექციის პრევენციას უკავშირდება. ინფორმაცია ამის შესახებ მედიას ირაკლი ჩიქოვანმა, პრემიერ-მინისტრის მრჩეველმა, პრესსპიკერმა განუცხადა.
„მოგეხსენებათ, ლენტეხის მუნიციპალიტეტში დაფიქსირდა კორონავირუსის შიდა გავრცელების ფაქტი დადასტურდა – 4 შემთხვევა, რაც გვაძლევს იმის საშუალებას, რომ უფრო აქტიური და ოპერატიული პრევენციული ღონისძიებები ჩავატაროთ ამ მუნიციპალიტეტში.
ეპიდემიოლოგების და მედიკოსების რჩევით, ასევე მიღებული ინფორმაციის საფუძველზე ჩვენ მივიღეთ გადაწყვეტილება, რომ ლენტეხის რაიონში ამოქმედდეს სრული კარანტინი, რაც გულისხმობს იმას, რომ ლენტეხის რაიონში ამოქმედდება ზუსტად ის რეჟიმი, რა რეჟიმიც დღესდღეობით არის ბოლნისისა და მარნეულის რაიონებში.
ეს გადაწყვეტილება განპირობებულია იმით, რომ ჩვენ გვინდა გავაკეთოთ ყველაფერი იმისათვის, რათა მაქსიმალურად შევზღუდოთ შიდა გავრცელება და შესაბამისად არ მოხდეს ამ კერის უფრო გაფართოება,“ – განაცხადა ირაკლი ჩიქოვანმა.
ლენტეხის რაიონის შესასვლელ და გამოსასვლელ პუნქტებს გააკონტროლებს შინაგან საქმეთა სამინისტრო და საქართველოს თავდაცვის ძალები. ასევე, როგორც ირაკლი ჩიქოვანმა განაცხადა, ადგილზე უკვე დაწყებულია პროაქტიური თერმოსკრინინგი, რომელშიც მონაწილეობენ ადგილობრივი თვითმმართველობის წარმომადგენლები და სამედიცინო პერსონალი.
ავტორი
თამთა ასლანიშვილი