დაავადებათა კონტროლის ეროვნული ცენტრის დირექტორის მოადგილემ პაატა იმნაძემ განაცხადა, რომ ლუგარის ლაბორატორია არ არის გათვალისწინებული ვაქცინებზე სამუშაოდ, რადგან ვაქცინაზე მუშაობას გარკვეული ტიპის ვივარიუმი სჭირდება. მან, ასევე, ისაუბრა ქართველ მეცნიერზე, გიორგი ბაბუაძეზე, რომელიც კანადაში ამ ეტაპზე “კოვიდ 19”-ის ვაქცინაზე მუშაობს:
„ლუგარის ცენტრი თავისი ფუნქციონირების მოდელით არ არის გათვალისწინებული ვაქცინებზე სამუშაოდ, ამას პირველ რიგში სჭირდება გარკვეული ტიპის ვივარიუმი, რომელიც ჩვენთან ცხოველებზე უნდა ჩატარდეს ხოლმე ცდები. ჩვენთან არის მხოლოდ მცირე ზომის ცხოველებზე ჩასატარებელი ვივარიუმი, მაგალითად თაგვებზე. ვაქცინაზე გამოცდა, ჩვეულებრივ უფრო დიდი ზომის ცხოველებზე ტარდება. აქედან გამომდინარე ჩვენ სამწუხაროდ ვაქცინებზე ვერ ვმუშაობთ.
ჩვენ ბედნიერები ვართ იმით, რომ ჩვენი ცენტრის აღზრდილი ახალგაზრდა გიორგი ბაბუაძე, რომელიც ჩვენი ცენტრიდან წავიდა და მუშაობს ახლა კანადაში არის ერთ-ერთ ყველაზე მოწინავე ჯგუფში, რომლებიც ვაქცინებს ქმნიან მსოფლიოში, ის მუშაობდა ებოლას ვირუსის საწინააღმდეგო ვაქცინის შექმნაზე და ახლა მისი ჯგუფი მუშაობს “კოვიდ 19”-ის ვაქცინის შექმნაზე. გიორგი ძალიან ნიჭიერი კაცია და მე დიდი იმედი მაქვს, რომ გვასახელებს,“ – განაცხადა პაატა იმნაძემ.
ავტორი
თამთა ასლანიშვილი