„მინდა, მივმართო და ვთხოვო ჩემს თანატოლებს, ახალგაზრდებს, მათ, ვისაც გული შესტკივა ჩვენი ქვეყნის მომავალზე, დიდი ყურადღებით მოისმინონ და თვალყური ადევნონ დროებითი საგამოძიებო კომისიის მსვლელობას, რადგან განსაკუთრებით მათთვის, ვისაც შეიძლება, ასაკის გამო კარგად არ გვახსოვს ის საქმეები და დანაშაულები, რაც მაშინდელმა ხელისუფლებამ ქართველ ხალხს გამოატარა, კომისია კიდევ ერთხელ თვალსაჩინოს ხდის და ნათლად წარმოაჩენს, ვინ დგას მეორე მხარეს, ვინ გვესახება ე.წ. ოპოზიციურ ძალად და ვინ გვესაუბრება სამშობლოს ვითომ სიყვარულზე“, – განაცხადა საპარლამენტო უმრავლესობის წევრმა ლიკა შარტავამ პლენარულ სხდომაზე.
მისი თქმით, წლების განმავლობაში საზოგადოების გარკვეულ ნაწილს თითქოს მიავიწყდა ის სისასტიკე, რაც ხალხმა განიცადა.
„განსაკუთრებით ემოციურია პირველწყაროდან მოსმენილი ტრაგიკული ამბები, რაც, დარწმუნებული ვარ, ადამიანს თანაგრძნობის და, ამასთანავე, ბრაზის გარეშე ვერ დატოვებს. მარტივი არ არის ხელახლა მოისმინო და განიცადო ყველა ის მძიმე ფაქტი თუ ისტორია, რაც მაშინდელმა რეჟიმმა ჩაიდინა.
მინდა, დიდი მადლობა გადავუხადო კომისიის თავმჯდომარეს, ქალბატონ თეას, რომელიც ღირსეულად უძღვება საქმეს, კომისიის წევრებს და ყველას, ვინც სანდო ინფორმაციას აწვდის მათ.
ვიმედოვნებ, რომ თითოეული ჩვენგანი იაზრებს, რამხელა მნიშვნელობა აქვს კომისიის საქმიანობას და სამომავლოდ მიღებულ დასკვნას“, – განაცხადა ლიკა შარტავამ.
ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს
