„ახალი საქართველოს“ თავმჯდომარემ გიორგი ვაშაძემ და სხვადასხვა სფეროს ექსპერტებმა ანტიკრიზისულ გეგმასთან დაკავშირებით დისკუსია გამართეს. იმსჯელეს, თუ როგორ უნდა გამოვიდეს ქვეყანა შექმნილი კრიზისული მდგომარეობიდან მაქსიმალურად სწრაფად, როგორც ჯანდაცვის მხრივ, ასევე ეკონომიკური მიმართულებით:
“პარასკევს სტრატეგია „აღმაშენებლის“ გუნდის მიერ შემუშავებული ანტიკრიზისული გეგმა წარვადგინეთ. სერგო ჩიხლაძე (ჯანდაცვის ექსპერტი) იყო ერთ-ერთი მთავარი ავტორი ამ გეგმის და არა მხოლოდ ის. ეს იყო ჯანდაცვის, სამხედრო და სხვა სფეროს ექსპერტებთან ერთად შემუშავებული გეგმა.
დღეს ჩვენ ერთი რამ უნდა გვესმოდეს: კაცობრიობა იმყოფება ომის პირობებში, შესაბამისად სწორედ საომარ სტრატეგიას აქვს განმსაზღვრელი მნიშვნელობა. სხვადასხვა ქვეყანამ აირჩია სხვადასხვა გზა, მაგრამ ჩვენ ორ კვირაზე მეტია ვთხოვთ ხელისუფლებას, რომ გამოაქვეყნოს საკუთარი ანტიკრიზისული გეგმა, რა სტრატეგიით მოქმედებს, სამწუხაროდ ასეთი დოკუმენტი არ გვიხილავს.
ასეთი დოკუმენტი გამოაქვეყნა აბსოლუტურად ყველა ქვეყანამ და არის საჯარო – დაწყებული სინგაპურიდან, იაპონიამ, სამხრეთ კორეამ, გერმანიამ, ამერიკის შეერთებულმა შტატებმა. თითოეულმა ადამიანმა იცის რა გზით მიდიან. სამწუხაროდ ჩვენ ასეთი დოკუმენტი არ გვინახავს, შესაბამისად სხვა გზა არ დაგვრჩენოდა, გარდა იმისა, რომ ჩვენი ვერსია შეგვეთავაზებინა.
რით განსხვავდება ფუნდამენტურად ჩვენი ვერსია იმისაგან, რასაც აქამდე საქართველო აკეთებს? პირველ რიგში განსხვავდება იმით, რომ ნაცვლად თავდაცვა-შეკავების სტრატეგიისა, ჩვენ ვთავაზობთ შეტევა-აგრესიული თავდასხმის სტრატეგიას. ყველა ქვეყანა ვინც აირჩია შეტევა და თავდასხმის სტრატეგია, სხვებთან შედარებით უკეთეს მდგომარეობაშია. ხაზი უნდა გავუსვათ, ვინც არ აირჩია ეს სტრატეგია, მათ ბევრი პრობლემა აქვთ, მაგალითად: იტალია, ესპანეთი, ჩაკეტილი ქვეყნები. საბოლოო ჯამში იმ ქვეყნებმა, ვინც თავიდან თავდაცვა-შეკავების სტრატეგია აირჩია, გადავიდა აგრესიული შეტევის სტრატეგიაზე. ჩვენ კი ისევ ვიმყოფებით თავდაცვა-შეკავების ვითარებაში.
ჩვენ გვინდა, რომ ინტენსიური იყოს დიალოგი და დისკუსია, რომ არასწორ გზაზე მიმავალი ანტიკრიზისული ნაბიჯები შემოვატრიალოთ როგორმე და წავიყვანოთ სწორ მიმართულებით. ხელთ მაქვს ორი დოკუმენტი, ერთი არის მოსამზადებელი სამუშაოები ამ აგრესიული შეტევისათვის, ხოლო მეორე დღეების მიხედვით გათვლილი, რა უნდა გავაკეთოთ ყოველდღე ამ კუთხით.
აუცილებლად მინდა ხაზი გავუსვა ერთ რამეს, ყველა ამ შეთავაზებით მივმართავთ საქართველოს მთავრობას. მე პირველი ვიყავი, ვინც მორატორიუმი გამოვაცხადე კრიტიკაზე და არც დღეს ვარ კრიტიკის რეჟიმში, მხოლოდ და მხოლოდ ვთავაზობთ სწორ გზას იმ საერთაშორისო გამოცდილების საფუძველზე, რაც დღეს არის. არც ერთხელ ჩვენ არ მიგვიმართავს სამედიცინო მუშაკებისათვის. რა უფლება მაქვს ვისაუბრო მკურნალობის მეთოდზე?! – მე ეს ნამდვილად არ ვიცი, მაგრამ კრიზისული მენეჯმენტი, რომელიც დღეს სჭირდება ქვეყანას ეს ნამდვილად გვეხერხება, ვიცით, გაგვივლია და არსებობს ამის საერთაშორისო გამოცდილება.
ჩვენ დროულად თუ არ გადავედით სწორი ნაბიჯების გადადგმაზე ყოველი დაკარგული დღე, ეს არის არა მხოლოდ ჯანმრთელობის პრობლემა, არამედ შიმშილის პრობლემა. ინდოეთში, დღეს გამოცხადდა, რომ არის შიმშილი. მე ნამდვილად არ მინდა, რომ ჩვენც ამ ვითარებაში ჩავვარდეთ.
ადამიანები, ვინც სახლში სხედან მთავარი კითხვა და ყველაზე მეტი “მესიჯი”, რაც მოდის ჩემთან მოდის – არის რა ვჭამო?! – ეს პრობლემა უდგას საქართველოს მოსახლეობის 95%-ს, მათ არანაირი დანაზოგი არ გააჩნიათ. საქართველოს ყოველი მესამე მოქალაქე წამლებს და პირველადი მოხმარების პროდუქტებს ვალით ყიდულობს. თუ ჩვენ ამ კრიზისიდან დროულად არ გამოვედით ამ ხალხმა რა უნდა ქნას?!“ – აღნიშნავს გიორგი ვაშაძე.
ავტორი
თამთა ასლანიშვილი
