პრემიერ-მინისტრი გიორგი გახარიამ, მინისტრებთან ეკატერინე ტიკარაძესთან და ქეთევან ციხელაშვილთან ერთად ზუგდიდის საავადმყოფოს შემდეგ რუხის მრავალპროფილური კლინიკა მოინახულეს და სამედიცინო დაწესებულების აღჭურვის პროცესს ადგილზე გაეცნენ. მთავრობის მეთაურის ინიციატივით, ახალ კორონავირუსთან ბრძოლის წინააღმდეგ მთელი საქართველოს მასშტაბით, კლინიკების მომზადება აქტიურად მიმდინარეობს:
„ეს არის მრავალფუნქციური საავადმყოფო საკმაოდ სერიოზული შესაძლებლობებით. ის დღემდე გაშვებული არ იყო და ვინაიდან დღეს გვაქვს სერიოზული გამოწვევები, ნახეთ რამდენად სწრაფად შეიძლება ამ საავადმყოფოს ამოქმედება.
უახლოეს დღეებში კლინიკა შეძლებს, მოემსახუროს კორონავირუსით პოტენციურად ინფიცირებულ ჩვენს მოქალაქეებს. ასევე რეგიონში იფუნქციონირებს საკარანტინო ზონები. ჩვენთვის მთავარია, მაქსიმალურად სწრაფად ავამოქმედოთ ეს ყველაფერი.
მოვუწოდებ რეგიონის მკვიდრ თითოეულ მედიკოსს და ექიმს – სრული მობილიზება უნდა გამოვაცხადოთ. ჩვენ ვსაუბრობთ არა მხოლოდ დასავლეთ საქართველოზე, არამედ მთელი ქვეყნის მასშტაბით მობილიზაციაზე. ყველას გვესმის, რომ ამ საავადმყოფოს ფუნქციონირებას აქვს სხვა ძალიან სერიოზული დატვირთვაც.
მოგეხსენებათ, დიდი რაოდენობით ხალხი გადმოდის საოკუპაციო ხაზის მიღმა ტერიტორიებიდან და რა თქმა უნდა, ჩვენ საოკუპაციო ხაზის ორივე მხარეს თითოეულ მოქალაქეს მივეხმარებით. აქ იქნება ჩვეულებრივი რეჟიმი. ყველა ადამიანი, რომელიც საოკუპაციო ხაზს გადმოკვეთს და დასჭირდება სამედიცინო დახმარება, ის ამ დახმარებას მიიღებს.
ვისაც სჭირდება საკარანტინო ზონა, საკარანტინო ზონას მიიღებს. ყველაფერს გავაკეთებთ იმისთვის, რომ დავიცვათ ჩვენი მოქალაქეების ჯანმრთელობა საოკუპაციო ხაზის ორივე მხარეს. ეს კრიტიკულად მნიშვნელოვანია და ეს არის ამ მძლავრი სამედიცინო ცენტრის ამოქმედების ძირითადი ფუნქცია და მისია,“ – აღნიშნა გიორგი გახარიამ.
რუხის მრავალპროფილურ კლინიკას ერთდროულად შეუძლია 100 პაციენტის მომსახურება. მათ 10 ხელოვნური სუნთქვის აპარატიც გადაეცათ.
ავტორი
თამთა ასლანიშვილი