იაშვილის სახელობის ბავშვთა ცენტრალური საავადმყოფოს სამედიცინო დირექტორი, მედიცინის მეცნიერებათა დოქტორი, პროფესორი ივანე ჩხაიძე მედიასთან შეფასება-განმარტებებს აკეთებს ქვეყანაში გრიპის ვირუსის ცირკულირებასთან დაკავშირებით:
“დაავადების მიმდინარეობის მიხედვით როგორც A, ისე B ტიპის ვირუსს, ახასიათებს მაღალი ცხელება, ძლიერი თავისტკივილი, თვალების და ყელის ტკივილი, კუნთებისა და სახსრების ტკივილი, ძლიერი საერთო სისუსტე, უმადობა…
სწორედ ეს განასხვავებს გრიპის ვირუსს სხვა ტიპის ვირუსებისგან და როდესაც გვესმის მოთხოვნა ტესტირების ჩატარებასთან დაკავშირებით, რომ აუცილებლად თვლიან ჩატარდეს ტესტირება და შემდეგ განისაზღვროს არის თუ არა გრიპის ვირუსი, ამ პერიოდში, გრიპის ვირუსების მაქსიმალური აქტიურობის პერიოდში, ტესტირების ჩატარების აუცილებლობა ნამდვილად არ არის. ამ კლინიკური სურათის მატარებელი ქვეყანაში მხოლოდ გრიპის ვირუსია.
თებერვლის მეორე კვირის მონაცემებიდან გამომდინარე, ჯერჯერობით, ქვეყანაში პიკი გადავლილი არ არის. პიკზე ვისაუბრებთ მაშინ, როდესაც გრიპის შემთხვევების რაოდენობა, სავარაუდოდ, პირველ ეტაპზე, ჩამოცილდება 50%-ს, ანუ ლაბორატორიულად დადასტურებული შემთხვევების 50%-ზე ნაკლები თუ დაფიქსირდა გრიპის შემთხვევები, თან ეს დაფიქსირება სტაბილური უნდა იყოს მინიმუმ 2-3 კვირის განმავლობაში, შეგვეძლება ვთქვათ, რომ უკვე პიკი გადავლილია.
ჯერჯერობით, ეს მაჩვენებელი მაღალია. ახლა ვართ ნამდვილად პიკის ეტაპზე“, – აცხადებს ივანე ჩხაიძე.
