ანალიტიკოსი, ექსპერტი უსაფრთხოების საკითხებში, ხათუნა ლაგაზიძე “ქართული ოცნების” კონკრეტული მხარდამჭერების მიმართ გარკვეული სახის დამოკიდებულების ჩამოყალიბებაზე საუბრობს, რათა მათ თამამად აქციონ ზურგი მმართველ ძალას:
“ირმა სოხაძის კომენტარს ვუყურებდი საპროტესტო აქციიდან… დიახ, ეს ხალხი იმსახურებს პატივისცემას, ვინც ხელისუფლების ბანგისგან გამოერკვა და პრივილეგიებზე უარი თქვა. ჩვენ მუდმივად ღია უნდა გვქონდეს კარი მათთვის. არ ვგულისხმობ სადისტებს, აგენტებს, კრიმინალებს და იდეოლოგებს.
რაზე დგას რეჟიმი? სამ საყრდენზე: მსხვილი ბიზნესი, ძალოვანი სტრუქტურები+სასამართლო; პროპაგანდისტული მედია. სამფეხა სკამივითაა: ერთი ფეხი თუ გამოეშალა, ორი ვეღარ შეაკავებს. ამიტომ, რა უნდა ვქნათ ჩვენ? უნდა ვეცადოთ ერთი ფეხის მაინც მუდმივ რყევას და გამოცლას. შესაბამისად, ხელისუფლებასთან შეზრდილი ბიზნესი ან ძალოვნები (მაგალითად, ირაკლი შაიშმელაშვილის მსგავსი) კიდევ უფრო მეტად კი არ უნდა შევაზილოთ და შევტენოთ ხელისუფლებას, რადგან აქეთ მხოლოდ მტრული გარემო ეგულებათ და გადარჩენის გზას მხოლოდ “ოცნების” კრიმინალურ რეჟიმთან ერთად ხედავენ, არამედ გადმოხტომის სურვილი და საშუალება დავუტოვოთ.
რევანში კი არ არ არის პირველხარისხოვანი, არამედ სახელმწიფოს ყოფნა-არყოფნის საკითხი და ამ კრიტერიუმით უნდა ვიაზროვნოთ“, – აცხადებს ხათუნა ლაგაზიძე.
