,,ერთიანობა – ნაციონალური მოძრაობის” ლიდერი, ,,სტრატეგია აღმაშენებლის” თავმჯდომარე გიორგი ვაშაძე, ვაშინგტონიდან მიმართვას ავრცელებს, სადაც განმარტებებს აკეთებს დონალდ ტრამპის ინაუგურაციაზე მიწვევაზე და კონკრეტულ პოზიტიურ მოლოდინებზე საუბრობს აშშ-ს ახალი ადმინისტრაციის მხრიდან, საქართველოსთან მიმართებაში:
,,მოგესალმებით ვაშინგტონიდან!
პრეზიდენტ ტრამპის ინაუგურაციაზე ვიმყოფები, რესპუბლიკელების მოწვევით. პარალელურად ძალიან ბევრი ღონისძიება ტარდება, სულ ორი დღით ჩამოვედი და რაც მთავარია ბავინახე საოცარი მხარდაჭერა, რომელიც აქვს ქართველ ხალხს, განსაკუთრებით იმ უპრეცედენტო მასშტაბის პროტესტის შემდგომ, რომელიც საქართველოშია იმიტომ, რომ ყველა ხედავს, ჩვენ ყველანი ერთად ვიბრძვით დემოკრატიული, ძლიერი საქართველოსთვის, რომელიც ევროპისა და ევროატლანტიკური სივრცის ღირსეული წევრი იქნება.
და კონსენსუსი, – ერთი ადამიანიც კი არ მინახავს, რომელსაც აქვს განსხვავებული აზრი, რომ არ შეიძლება მოხდეს აღიარება ივანიშვილის რეჟიმის, რომ ყველაფერი უნდა გაკეთდეს იმისთვის, რომ ქართველმა ხალხმა რაც შეიძლება მალე დაიბრუნოს ძალაუფლება და დავაბრუნოთ საქართველო დემოკრატიული განვითარების გზაზე.
ამისთვის აუცილებელია პოლიტპატიმრების განთავისუფლება და ახალი არჩევნები, რომელიც საფუძველს დაუდებს ივანიშვილის რეჟიმისგან საქართველოს განთავისუფლებას. რის შემდეგაც, აღდგება სტრატეგიული პარტნიორობა ამერიკასთან, კიდევ უფრო გაღრმავდება, მეტი ეკონომიკური საინვესტიციო თანამშრომლობა იქნება და რაც მთავარია, მეტი მეგობრობა ჩვენს უდიდეს პარტნიორთან, ამერიკის შეერთებულ შტატებთან.
ასე, რომ ივანიშვილის და ,,ქართული ოცნების” მითი რომ 20 იანვრის შემდგომ მათთვის რამე სასიკეთო შეიცვლებოდა, ერთხელ და სამუდამოდ, დამთავრდება და დარწმუნებული ვარ, რომ სხვა ალტერნატივა გარდა ახალი არჩევნების დანიშვნისა, ამ თვითმარქვია რეჟიმს ვერ და არ დარჩება.
ძალა ერთობაშია და აუცილებლად გავიმარჯვებთ“, – განაცხადა გიორგი ვაშაძემ.
ავტორი
მარიამ ხაჩირაშვილი
