ორი წამყვანი, კრიტიკულად განწყობილი ტელევიზიის ანგარიშებს, საქართველოს ფინანსთა სამინისტრომ, ინკასო დაადო, რითიც სერიოზული ფინანსური პრობლემები შეექმნებათ ტვ “პირველს” და “მთავარ არხს”:
„TV პირველის“ დამფუძნებელი ვატო წერეთელი ტელეკომპანიაზე ინკასოს დადებას ეხმაურება და აცხადებს, რომ მათი მტერი კორონაა და არა თავისუფალი მედია.
„არსებობს რაღაც, რასაც ალბათ ადამიანი ვერც კი წარმოიდგენს! მაშინ, როცა ქვეყანა კორონავირუსს ებრძვის! მაშინ, როცა ბიზნესს წარმოუდგენელი გამოწვევები აქვს! მაშინ, როცა არავინ იცის, რა ელოდება ამ ქვეყნის ისედაც მძიმე მდგომარეობაში მყოფ ეკონომიკას! მაშინ, როცა ჩვენი ტელევიზიის ჟურნალისტები და ოპერატორები საკუთარ ჯანმრთელობასა და სიცოცხლეს სასწორზე დებენ, რომ მაყურებელს ინფორმაცია მიაწოდონ. ინფორმაცია, რომელიც არა ნაკლებ მნიშვნელოვანია, ვიდრე წამალი! მაშინ, როცა ერთიანობა ახლა ყველაზე მნიშვნელოვანია! ტელეკომპანია ,,პირველს” ისევ ინკასო დაადეს! გაოგნებული ვარ და სიტყვები არ მყოფნის!
ბატონებო, ჩვენი და თქვენი მტერი კორონაა და არა თავისუფალი მედია!
გავიმეორებ: ხალხი აქ საკუთარ სიცოცხლეს საფრთხის ქვეშ აყენებს, თქვენ კი ამ ჟურნალისტებს, ოპერატორებს, მემონტაჟეებს, მძღოლებს შემოსავლის გარეშე ტოვებთ!!!“ – განაცხადა ვატო წერეთელმა.
ამ საკითხთან დაკავშირებით კომენტარი „მთავარი“ არხის საინფორმაციო სამსახურის ხელმძღვანელმა ნოდარ მელაძემაც გააკეთა:
„მაშინ როდესაც ბიზნესი კრიზისშია, შესაბამისად ვერც ტელევიზიებს ურიცხავს სარეკლამო მომსახურების თანხას, ფინანსთა სამინისტრომ გადაწყვიტა, რომ მედიის მუშაობა არაა საჭირო და ინკასო დაადო ორ ტელევიზიას, “მთავარ არხს” და ტვ პირველს,“ – განაცხადა ნოდარ მელაძემ.
ავტორი
თამთა ასლანიშვილი
