ბიზნესისთვის ინკასოების დადების თემაზე გაამახვილა ყურადღება დღევანდელ ბრიფინგზე „ახალი საქართველოს“ თავმჯდომარემ. გიორგი ვაშაძეს, ფინანსთა სამინისტროს ასეთი ქმედება, კატეგორიულად მიუღებლად მიაჩნია და მოუწოდებს დამოკიდებულების შეცვლისკენ:
„ერთ-ერთი პირველი ვიყავი პოლიტიკოსებს შორის, ვინც მართლაც მონატორიუმი გამოვაცხადეთ კრიტიკასთან დაკავშირებით და შევთავაზეთ ხელისუფლებას ყოველმხრივ მხარდაჭერა იმ მძიმე ვითარებაში რაშიც საქართველო, ისევე როგორც მთელი მსოფლიო არის.
დღეს ფინანსთა სამინისტრომ საქართველოში მოქმედ ბიზნესს მასიურად დაადო ინკასო. 2018 წელს საპრეზიდენტო არჩევნების წინ, როცა უნდოდათ ინკასო გადაწიეს და არ დაადეს ბიზნესს. თქვენ ხომ გესმით რა ვითარებაშია დღეს ქართული ბიზნესი? ხელფასებს ვერ გასცემს, უზარმაზარი პრობლემების წინაშეა არიან და ახლა ფინანსთა სამინისტრომ მათ დაადო ინკასო.
რაც ნიშნავს იმას, რომ ამ უმძიმეს ვითარებაში კიდევ უფრო ყელში წაუჭირონ ქართულ ბიზნესს. ეს არის სარესტორნო ბიზნესი, ეს არის სხვადასხვა ტიპის ბიზნესები, ასობით ადამიანი გვირეკავს და გვიკავშირდება ამ საკითხზე.
ხელფასები უნდა გაეცათ და ხელფასებს ვერ გასცემენ, იმიტომ რომ მათი ანგარიშები გაყინულია. ფინანსთა სამინისტროს უნდა ჰქონდეს კონკრეტული სამოქმედო სამუშაო გეგმა როგორ მუშაობს ამ მიმართულებით,“ – განაცხადა გიორგი ვაშაძემ.
ავტორი
თამთა ასლანიშვილი