რუსეთის ფედერაციამ საიას დაცვის ქვეშ მყოფ 7 პირს კომპენსაცია გადაუხადა. საკითხი ეხება რუსეთიდან ქართველების კოლექტიური გამოძევების შედეგად დაზარალებულ ადამიანებს. ინფორმაციას საქართველოს ახალგაზრდა იურისტთა ასოციაცია ავრცელებს.
როგორც ცნობილია 2006 წელს რუსეთის ფედერაციამ ქართველები იძულების წესით და ადამიანის უფლებების უხეში დარღვევებით საქართველოში 1500 ადამიანი გამოადეპორტა. დაზარალებულებმა სტრასბურგის სასამართლოში რუსეთის ფედერაციის წინააღმდეგ შეიტანეს საჩივარი, 8 მათგანს კი ჰქონდა ინდივიდუალური საჩივრები ევროპულ სასამართლოში შეტანილი, რომელთა უფლებებსაც საქართველოს ახალგაზრდა იურისტთა ასოციაცია იცავდა.
საიას განცხადებით 7 დაზარალებულს ჩაერიცხათ კომპენსაციის თანხა, ხოლო ერთ მომჩივანთან დაკავშირებით რუსეთთან მოლაპარაკებები მიმდინარეობს.
„ამ ეტაპზე რუსეთის ფედერაციამ საიას დაცვის ქვეშ მყოფ 7 პირს ჩაურიცხა ევროპული სასამართლოს 2019 წლის 26 მარტის გადაწყვეტილებით მიკუთვნებული კომპენსაცია, ხოლო ერთ მომჩივანთან მიმართებით საია აგრძელებს კომუნიკაციას რუსეთის ფედერაციასთან,“ – ნათქვამია საიას ოფიციალურ განცხადებაში.
საიას ინფორმაციით გადაწყვეტილება ევროპულმა სასამართლომ 2019 წლის 26 ივნისს მიიღო და სამი თვე ჰქონდა ვადა დაკისრებული კომპენსაციის გადასახდელად, ვადა 2019 წლის 26 სექტემბერს გავიდა. თუმცა, დადგენილ ვადაში რუსეთს საიას დაცვის ქვეშ მყოფი პირებისთვის თანხა არ გადაუხდია.
„ინდივიდუალურ საქმეებზე ევროპულმა სასამართლომ გადაწყვეტილება 2019 წლის 26 მარტს გამოიტანა. გადაწყვეტილებით, რუსეთს დაზარალებული მოქალაქეებისთვის, მათ შორის საიას დაცვის ქვეშ მყოფი 8 პირის, სასარგებლოდ სხვადასხვა ოდენობის კომპენსაცია (2000 ევრო ან/და 10,000-დან 15,000 ევროს ფარგლებში) უნდა გადაეხადა. კომპენსაციის ოდენობა თითოეულ მომჩივანთან მიმართებით ინდივიდუალურად განისაზღვრა მათ მიმართ დარღვეული უფლებების სიმძიმის, ინტენსივობისა და ხანგრძლივობის გათვალისწინებით,“ – ნათქვამია განცხადებაში.
ასევე ცნობილია, რომ ინდივიდუალური საქმეების გარდა რუსეთის წინააღმდეგ საქართველომ სარჩელი მოიგო და სახელმწიფოთაშორისი საჩივრის ფარგლებშიც დაეკისრა 10 მილიონი ევროს ოდენობით თანხის გადახდა იძულებით დეპორტირებული 1500 პირისათვის. ევროპულმა სასამართლომ გადაწყვეტილება 2019 წლის 31 იანვარს გამოიტანა, თუმცა დაკისრებულ მოვალებას რუსეთი თავს არიდებს, რის გამოც ევროპული მინისტრთა კომიტეტისაგან მწვავე კრიტიკა დაიმსახურა.
ავტორი
თამთა ასლანიშვილი
