ოთხი პოლიტიკური კოალიცია/პარტია – “კოალიცია ცვლილებებისთვის”, “ერთიანობა ნაციონალური მოძრაობა”, “ძლიერი საქართველო”, “გახარია საქართველოსთვის”, ერთობლივ განცხადებას ავრცელებს:
“ქართველი ხალხის ლეგიტიმური მანდატის მქონე კოალიციები/პარტიები ერთად ვუპირისპირდებით “ქართული ოცნების” არალეგიტიმურ რეჟიმს და მის მიერ ორგანიზებულ სისტემურ ძალადობას მშვიდობიანი მანიფესტანტების და ჟურნალისტების წინააღმდეგ. ყველა დაკავებული დემონსტრანტი დაუყოვნებლივ უნდა გათავისუფლდეს!
ერთობლივი, კოორდინირებული ძალისხმევით ვიბრძვით ქუჩაში, ქართველ ხალხთან ერთად, ჩვენი საერთო სახელმწიფოს გადასარჩენად.
თანამშრომლობის რეჟიმში ვთანხმდებით, რომ ქმედით დახმარებას აღმოვუჩენთ დემონსტრანტებს, მათ შორის სამართლებრივი, საინფორმაციო და სამედიცინო მხარდაჭერით.
შექმნული უმძიმესი ვითარებიდან გამოსავალი ახალი არჩევნების ჩატარებაა საერთაშორისო ჩართულობით, ახალი საარჩევნო ადმინისტრაციის და პოლიტიკურად ნეიტრალური სამართალდამცავი და სხვა სახელმწიფო უწყებების პირობებში.
ერთად მოვუწოდებთ საერთაშორისო თანამეგობრობას, დაგმონ მშვიდობიანი დემონსტრანტების წინააღმდეგ სისტემური ძალადობა, გააკეთონ მკაფიო განცხადებები მიტაცებული არჩევნების შედეგების არ აღიარების თაობაზე და გადადგან ქმედითი საპასუხო ნაბიჯები.
ჩვენი ბრძოლა საერთოა და ის ქართული დემოკრატიის და მისი ევროპული პერსპექტივის გამარჯვებამდე გაგრძელდება!” – ნათქვამია გავრცელებულ განცხადებაში.
ინფორმაციას პოლიტიკური პარტია “სტრატეგია აღმაშენებლის” მედიასთან და საზოგადოებასთან ურთიერთობის სამსახური ავრცელებს
