„ახალი საქართველოს“ თავმჯდომარე გიორგი ვაშაძე კორონავირუსის გამო საქართველოში მიმდინარე ეკონომიკურ კრიზისზე ყურადღებას ამახვილებს და ბიზნეს გარემოს აფასებს.
მისი განცხადებით პრობლემები მხოლოდ ტურისტული მიმართულებით არ გვაქვს, პრობლემებია ასევე გადაზიდვების მიმართულებით, მანქანების რეექსპორტის მიმართულებითაც და სწორედ ამიტომ ბევრი ნაბიჯია გადასადგმელი.
„პირველი, რომ სწორედ სტრატეგია „აღმაშენებლის“ გუნდმა და ჩვენ გავაკეთეთ პირველი განცხადება ეკონომიკასთან დაკავშირებით, რასაც გამოეხმაურა მთავრობა. პირველ ნაბიჯებსაც ვხედავთ, თუმცა ვფიქრობ კიდევ ბევრი ნაბიჯია გადასადგმელი.
მხოლოდ ტურისტულ სექტორს არ ეხება საქმე, აქ არის მანქანების რეექსპორტის საკითხი, რომელიც საკმაოდ დიდი ბიზნესია და ბევრი ადამიანია ჩართული ამაში, მცირე და საშუალო ბიზნესის წარმომადგენელი და მათ სჭირდებათ ხელშეწყობა. ასევე არის პრობლემები გადაზიდვებში.
მე ვფიქრობ, რომ ძალიან მნიშვნელოვანია უბრალოდ კი არ ვთქვათ, რომ გვაქვს ანტიკრიზისული გეგმა, უნდა გამოვიდეს ყოველ დილით პრემიერი და თქვას დღევანდელი მოქმედების სცენარი ესეთია: პირველი, მეორე, მესამე… ასე უნდა იმუშაოს მთავრობამ, რომ კონკრეტულად ვიცოდეთ ყველაფერი.
რაც შეეხება საგანგებო სიტუაციის გამოცხადებას, იყო საუბარი და მე არ ვემხრობი ამას, იმიტომ, რომ ჩვენი კონსტიტუციით სალომე ზურაბიშვილის ხელში ნიშნავს მართვის სადავეების გადასვლას და ყველას გვესმის სად შეიძლება წავიდეთ ამ კუთხით.
ნომერ პირველი პრობლემა კი, რაც დღეს დგას ჩვენს წინაშე, არის ის, რომ კორონავირუსზე სწრაფი ტესტის შესაძლებლობა იყოს. ალბათ უფასო ან ხელმისაწვდომი,“ – აცხადებს გიორგი ვაშაძე.
ავტორი
თამთა ასლანიშვილი
