“ცესკოს მხრიდან არასამართლიანი მიდგომისა და საჩივრების მიკერძოებული განხილვის გამო სასამართლოს მივმართეთ” – ლაშა ფარულავა

ხელისუფლების მხრიდან ადმინისტრაციული რესურსის გამოყენების გამო “ერთიანობა ნაციონალური მოძრაობის” მიერ თბილისის საქალაქო სასამართლოში შეტანილ სარჩელთან დაკავშირებით, რომელსაც თან ერთვის ადმინრესურსის გამოყენების ამსახველი ვიდეომასალა, “ერთიანობა – ნაციონალური მოძრაობის” პოლიტსაბჭოს წევრმა ლაშა ფარულავამ ისაუბრა:

“პირდაპირ შეგვიძლია ვთქვათ, რომ გადაწყვეტყილება, რომელიც მიიღო ცესკომ ამ დარღვევასთან დაკავშირებით, მიკერძოებულია, ვინაიდან ცესკოს მდივანი, ბატონი ჯავახიშვილი საკრებულოს თავმჯდომარის გიორგი ტყემალაძის ახლო ნათესავია და ამ ჩარჩოებიდან გამომდინარე მიიღეს გადაწყვეტილება, რომელიც მხოლოდ “ქართული ოცნების” ინტერესებს ემსახურება.

ეს არის არასამართლიანი მიდგომა და საჩივრების მიკერძოებული განხილვა და ამიტომ ჩვენ მივმართეთ სასამართლოს. არც სასამართლოსგან გვაქვს მოლოდინი, რომ სამართლიანი გადაწყვეტილება იქნება მიღებული, მაგრამ ჩვენ მათსავე მოედანზე ვიბრძოლებთ და მათსავე მოედანზე გავიმარჯვებთ, ქართველ ხალხთან ერთად“, – განაცხადა ლაშა ფარულავამ.

ინფორმაციას “ერთიანობა – ნაციონალური მოძრაობის” პრესსამსახური ავრცელებს