სტრატეგია „აღმაშენებლის“ გუნდი და „ახალი საქართველოს“ თავმჯდომარე გიორგი ვაშაძე საოკუპაციო ხაზთან სოფელ ოძისში მივიდნენ, მოინახულეს ადგილობრივი მოსახლეობა და ანტისაოკუპაციო მოძრაობა “ძალა ერთობაშიას” ლიდერს დავით ქაცარავას სოლიდარობა გამოუცხადეს. გაერთიანებული ოპოზიციის ერთ-ერთი ლიდერი და მისი გუნდის წევრები საზღვრის უკანონო ბორდერიზაციას აპროტესტებენ. გიორგი ვაშაძის თქმით ხელისუფლება არაფერს აკეთებს რუსული აგრესიის შესაჩერებლად:
“ხელისუფლებას აუცილებლად უნდა ჰქონდეს დეოკუპაციის სტრატეგია, თუ რას აკეთებს საოკუპაციო ხაზთან დაკავშირებით.
იმისათვის, რომ ხვალ, ზეგ ან მუდმივად არ ვიყოთ რუსეთის მხრიდან აგრესიის მსხვერპლი. 2012 წლიდან რუსმა ოკუპანტებმა 55 კილომეტრი შემოღობეს და ამის სანაცვლოდ ჩვენ სამწუხაროდ არაფერს ვაკეთებთ. ხალხს იტაცებენ, გვიკლავენ და ჩვენ ისევ არაფერს ვაკეთებთ.
დაახლოებით ერთ კვირაში ან 10 დღეში კიდევ ჩამოვალთ აქ და უკვე კონკრეტულ სამოქმედო გეგმას წარვადგენთ თუ რა უნდა კეთდებოდეს საქართველოს დეოკუპაციისათვის,“ – განაცხადა გიორგი ვაშაძემ.
ავტორი
თამთა ასლანიშვილი