“მაჟორიტარული სისტემით შესაძლებელია მანიპულაციების მოხდენა, სწორედ ამიტომ ფუნდამენტური განსხვავება არ არის 100/50 იქნება თუ 110/40”, – აცხადებს „ახალი საქართველოს“ თავმჯდომარე გიორგი ვაშაძე და იქვე აფიქსირებს პრინციპულ პოზიციას, რომ ადგილებითა და მანდატებით ვაჭრობა მისთვის მიუღებელია.
„110/40 ეს ვთქვი იმიტომ, რომ გაჟღერდა თითქოს და ამაზე შეიძლებოდა ფიქრი „ქართული ოცნების“ მხრიდან, ეს ჩვენთვის ფუნდამენტურ განსხვავებას არ აკეთებს 100/50 თუ 110/40. მე ამიტომ განვაცხადე ეს ცალსახად, რომ ჩვენ ადგილებით, მანდატებით და ა.შ. ვაჭრობა არ გვაინტერესებს. გვაინტერესებს მაქსიმალურად პროპორციული მისწრაფება იყოს საარჩევნო თვალსაზრისით და არავის არ ჰქონდეს შესაძლებლობა მანიპულაციები მოახდინოს მაჟორიტარული სისტემით,“- განაცხადა გიორგი ვაშაძემ.
ოპოზიციონერი ლიდერის თქმით ეს შეთავაზება მან არაფორმალურ შეხვედრაზე მიიღო, რომელიც მალევე დატოვა. რადგან ონკოლოგიის ნაციონალურ ცენტრში ჰქონდა დაგეგმილი ვიზიტი და წასვლამდე გაკეთებულ კომენტარში ხაზი გაუსვა იმ პრინციპულ პოზიციას, რომ თუკი პოლიტიკურ პარტიას 40%-ზე ნაკლები მხარდაჭერა ექნება, მან მთავრობა არ უნდა დააკომპლექტოს.
„ჩვენ საჯაროდ გვაქვს გაცხადებული, რომ საარჩევნო სისტემაზე საუბრისას საკითხი შეეხებოდა ფორმულას, რომ 40%–ზე მეტი უნდა ჰქონდეს, ვთქვათ, გაერთანებულ ოპოზიცია „ძალა ერთობაშიას“ მხარდაჭერა, რომ დააკომპლექტოს მთავრობა. თუ ასე არ იქნება, ჩვენ მხარს არ დავუჭერთ.
არაფორმალური შეხვედრა მალევე დავტოვე, რადგან ონკოლოგიურ საავადმყოფოში წავედი, სადაც ექიმებს შევხვდი, რომლებსაც 9 თვეა ხელფასი არ აუღიათ,” – განაცხადა „ახალი საქართველოს“ თავმჯდომარემ.
ვაშაძემ ასევე აქცენტი გააკეთა დასავლეთის გზავნილებზე. მისი განცხადებით საქართველო იზოლაციის საფრთხის წინაშე დგას და სწორედ მშვიდობიანმა პროტესტმა მიიტანა დასავლეთამდე ეს განწყობები.
„იმდენად მძაფრი და მკაფიოა დასავლეთის პოზიცია, რომ ამან „ქართული ოცნება“ სერიოზულად დააფიქრა და გამოსავალი უნდა მოძებნოს – ეს შემიძლია ცალსახად ვთქვა და სამწუხაროა, რომ ისინი ხალხს არ უსმენენ საქართველოში.
ძალიან ვწუხვარ, რომ გვყავს ხელისუფლება, რომელსაც ხალხი არაფერში არ ადარდებს და ერთადერთი, რაც მათ ადარდებთ ეს არის დასავლეთის ზეწოლა და წნეხი.
მინდა ვთქვა, რომ სწორედ ჩვენმა მშვიდობიანმა, არაძალადობრივმა პროტესტმა მოიტანა დასავლეთში ეს განწყობები. უნდა გვესმოდეს, რომ იმ ნოემბრის შემდეგ, რაც გვქონდა თვენახევრის მანძილზე, ძალიან აქტიურმა პროტესტმა, დიდი შედეგი გამოიღო.
საქართველო არის საგარეო იზოლაციის საფრთხის წინაშე, თუ „ქართული ოცნება“ გააგრძელებს ისე, როგორც აკეთებს დღეს, საქართველო დასავლეთისგან იზოლაციაში მოექცევა, დასავლეთის ეს გზავნილები არ არის მხოლოდ „ქართული ოცნებისათვის“, ეს არის ქართული საზოგადოებისთვის და ჩვენ ყველამ ერთად უნდა გადავწყვიტოთ გვინდა ჩვენ დასავლეთზე ორიენტირებული, ევროკავშირის წევრი ქვეყანა საქართველო თუ გვინდა იზოლაციაში მყოფი, დასავლეთის ზეწოლა და წნეხი,“ – აღნიშნა გიორგი ვაშაძემ.
