“ასეთი ადამიანისთვის ქვეყნის ნდობა, უბრალოდ საშიშია, როგორც დაგვანახა ბოლო 12-მა წელიწადმა” – ზაზა ბიბილაშვილი ბიძინა ივანიშვილზე

,,ჭავჭავაძის კვლევითი ცენტრის” დამფუძნებელი, ზაზა ბიბილაშვილი სააგენტო ,,პარალელთან” ინტერვიუში საუბრობს ,,ქართული ოცნების” დამფუძნებელსა და საპატიო თავმჯდომარეზე, ბიძინა ივანიშვილზე, იმ ფონზე, თუ როგორ მიმართა მან მხარდამჭერებს ტყვიაგაუმტარი მინის ბარიერიდან, მმართველი პარტიის მიერ მცხეთაში ჩატარებულ ღონისძიებაზე:

,,ეს არის ადამიანი, რომელიც გამოჩენის პირველივე დღიდან პარანოიდალური თვისებებით გამოირჩეოდა. გამოჩენამდეც ყველამ კარგად იცის, რომ ის ემალებოდა საზოგადოებას.

,,ტვ ნადეჟდამ” სიუჟეტი გაშვა, სადაც ამბობენ, რომ თურმე ტრამპიც გამოსულა, მას შემდეგ რაც თავს დაესხნენ, ტყვიაგაუმტარი შუშის მიღმა.

შევახსენოთ საზოგადოებას, რომ ტრამპი წლების განმავლობაში იყო პოლიტიკაში, მსოფლიოს უძლიერესი ქვეყნის პრეზიდენტი იყო, მერე ოპოზიციური პარტიის ლიდერი იყო. მთელი ამ ხნის განმავლობაში მსგავსი არაფერი ყოფილა. ივანიშვილი კი გამოჩენის დღიდან ზუსტად ასე მოქმედებდა, ასეთი იყო მისი საარჩევნო კამპანია. 2012 წელს, როდესაც მან საქართველო მიტინგებით მოიარა, ზუსტად ასეთი ბრონირებული შუშის უკან იდგა.

შევახსენებ საზოგადოებას – ჟურნალისტები რომ მიიპატიჟა თავისთან პრესკომფერენციაზე, ბახილები ჩააცვა. შესაბამისად, ეს არის ადამიანი, რომელიც უბრალოდ არ ენდობა ადამიანებს, მას არ უყვარს ადამიანები. ასეთი ადამიანისთვის ქვეყნის ნდობა, უბრალოდ საშიშია, როგორც დაგვანახა ბოლო 12-მა წელიწადმა.

ნიშანდობლივია ისიც, რომ მთელი ,,ქოცური” პროპაგანდის ერთ-ერთი ქვაკუთხედი იყო, რომ წინა ხელისუფლების ლიდერი, მიხეილ სააკაშვილი თურმე ფრონტის ხაზიდან გაიქცა, როდესაც ის ომის დღეებში იმყოფებოდა ფრონტის წინა ხაზზე და როდესაც რუსული სამხედრო თვითმფრინავი გამოჩნდა, როდესაც დაცვამ გაარიდა, ამის შემდეგ მოხდა მისი ფიზიკური საფრთხისგან არიდება.

შევადაროთ ეს ყოველივე იმას, რომ ივანიშვილი 12 წელია, თითქოს მშვიდობის პირობებში, არ მიახლოებულა საოკუპაციო ზოლთან. დღესაც კი, როდესაც მან ასეთი სანუკვარი სისტემა შეიქმნა, სადაც რეალურად ყველას და ყველაფერს აკონტროლებს – სუსი, პოლიცია მისია, უსაფრთხოების ყველა ბერკეტი მის ხელშია, ტოტალური ძალაუფლება აქვს ამ ეტაპზე მას ქვეყანაში, რეალურად დიქტატორია. ამ ვითარებაშიც კი ის ვერ ბედავს, რომ საკუთარ ხალხს დაენახოს პირდაპირ. ამდენად არ აქვს მას ადამიანების ნდობა, ამდენად იცის მან, თვითონ – რა აქვს დაშავებული, შესაბამისად, სხვამ რომ იცოდეს, ალბათ, რამხელა რისკის ქვეშ დადგებოდა.

შევახსენოთ საზოგადოებას მისი პროპაგანდისტების ერთ-ერთი საუბარი, შალვა რამიშვილის და ლაშა ნაცვლიშვილის, როდესაც ისინი პირდაპირ აღიარებენ, ,,რამდენი სიავე გვაქვს გაკეთებულიო, ჯერ ეს ერთი უნდა გავიხსენოთო, მაგრამ იმისი დიდი ნაწილი არ იცის ხალხმაო, რაც გაკეთებული გვაქვსო და რომ იცოდეს, რა დღეში ჩაგვაგდებდნენ წარმოიდგინეო”.

ივანიშვილმა ხომ იცის ეს ყველაფერი. სწორედ ეს არის მიზეზი იმისა, რომ საკუთარ ხალხს ემალება და ძალით ახდენს ხალხის მობილიზებას. ცხადია, ადმინისტრაციული რესურსის გამოყენებით მიჰყავს ადამიანები, რომელთაც საერთოდ არ აიტერესებთ მისი ნაბოდვარი ტექსტები, რომელიც დაწერილია რუსული პროპაგანდისტების მიერ”, – განაცხადა ზაზა ბიბილაშვილმა.

ავტორი
ნინი ხიჯაკაძე