“ვეტერინარული სფეროს ლიცენზირება, ზღვრული ფასები ვეტერინარულ მომსახურებ-ებზე, სუბსიდირება, შშმ სტატუსის განსაზღვრა და შეღავათები მიუსაფარი ცხოველების მიმკედლებლებს” – პარლამენტში საკანონმდებლო ინიციატივა დარეგისტრირდა

დღეს პარლამენტში მეტად მნიშვნელოვანი საკანონმდებლო წინადადება დარეგისტრირდა 11 – 9064/24 ცხოველთა უფლებადამცველის შორენა ლობჟანიძისა და ცხოველთამოყვარულის, ნანა ხომასურიძის მიერ.

ავტორების ინფორმაციით:

,,საქართველოში საკმაოდ რთული ვითარებაა არა მხოლოდ მიუსაფარი ცხოველების პოპულაციის მართვისა და მათი სისასტიკისგან დაცვის მიმართულებით, არამედ ზოგადად ვეტერინარიაში. ქვეყანაში არ არსებობს ვეტერინარული კლინიკებისა და ექიმების ლიცენზირება. არ გვაქვს კანონი ლიცენზირების შესახებ. არ ევალებათ შესაბამისი პროტოკოლების და ჰაიდლაინების დაცვა. შესაბამიად, კომპანიონი ცხოველის ვეტერინარულ კლინიკაში გარდაცვალებისას, ცხოველის მესაკუთრე ვერ იდავებს სამართლებრივად, რადგან ნებაყოფლობით ენდობა არალიცენზირებულ ვეტერინარულ შპს-ს ანუ შეზღუდული პასუხისმგებლობის კომპანიას, რომელსაც ფაქტიურად არ აქვს არანაირი ვალდებულებები ვეტერინარიის და მესაკუთრის მიმართულებით.

ასევე, კატასტროფული ვითარებაა ვეტერინარული მომსახურების ღირებულებაზე, რომლებიც უმეტესწილად მინიმუმ 3-ჯერ აღემატება ადამიანების სამედიცინო გამოკვლევებს და ქირურგიულ ოპერაციებს, მათ შორის მიუსაფარ ცხოველებზე და წლამდე ნაყარზეც კი, რომელთაგან ეს უკანასკნელი შესაძლოა საერთოდ ვერ გამოვიდეს ნარკოზიდან, თუმცა ათასობით ლარი მაინც გადასახდელად უფიქსირდება კლინიკაში მიმყვან/ინიციატორ მოქალაქეს.
განსაკუთრებით აღსანიშნავია საპენსიო ასაკის მოქალაქეები, რომლებიც ბანკიდან სესხსაც კი იღებენ მხოლოდ იმიტომ, რომ ქუჩაში ნაპოვნ კნუტს ან ლეკვს დაეხმარონ და შემდეგ წლობით უწევთ უკვე გარდაცვლილი ცხოველის ნაშიერის გამო სესხის დაფარვა.

მოქმედი ვეტერინარული კლინიკები არ გასცემენ დასკვნას შინაური ბინადარი ცხოველის ჯანმრთელობის მდგომარეობის შესახებ, რაც დაუშვებელია და არ არსებობს კონკრეტული სტატუსი შშმ ცხოველებთან მიმართებაში.
დღევანდელი მოცემულობით, საქართველოს მოსახლეობის გარკვეულ ნაწილს ნებაყოფლობით ნაკისრი აქვს სახელმწიფოს ვალდებულება მიუსაფარ ცხოველებად ქცეულ კომპანიონ ცხოველებზე, მათ შორის ადამიანთა სისასტიკეს გადარჩენილებზე. ამიტომ, ხელისუფება ვალდებულია ანგარიში გაუწიოს იმ ცხოველთამოყვარულებს მაინც, ვინც ყოველდღიურ რეჟიმში პატრონობს ტრამვირებულ, დასახიჩრებულ ცხოველებს და თითოეულ მიმკედლებელზე განსაზღვროს კვარტალში ერთხელ ფულადი კონპენსაცია და სანიტარული საშუალებების უფასო კალათი“, – განაცხადეს ავტორებმა.