“ეს საშინელი ტრაგედია კიდევ ერთხელ გვახსენებს, რომ წინა ხელისუფლებამ ვერ აირიდა თავიდან ეს ომი, პირიქით, პროვოკაციებზე პირდაპირ წამოეგო” – ირაკლი ღარიბაშვილი

2008 წლის აგვისტოს ომთან დაკავშირებით მძიმე შეფასებებით და კონკრეტული ბრალდებებით საუბრობს პარტია “ქართული ოცნების” თავმჯდომარე, ირაკლი ღარიბაშვილი:

“იცით, რომ ამ ომმა საშინელი შედეგები მოუტანა ჩვენს ქვეყანას. დღეს ჩვენი ქვეყნის ტერიტორიის 20% არის ოკუპირებული და ომის შემდეგ რუსეთმა ჩვენს ტერიტორიაზე განათავსა სამხედრო ბაზები. დაიკარგა 100-ზე მეტი სოფელი.

შეიძლება ითქვას, რომ წინა ხელისუფლებამ აბსოლუტურად მოღალატეობრივად ჩააბარა კოდორის ხეობა, უბრძოლველად და ომის შედეგად, რაც მთავარია, დავკარგეთ 400-ზე მეტი ჩვენი თანამოქალაქე – სამხედროები, პოლიციელები, სამოქალაქო პირები.

ეს საშინელი ტრაგედია კიდევ ერთხელ გვახსენებს, რომ წინა ხელისუფლებამ ვერ აირიდა თავიდან ეს ომი, პირიქით, პროვოკაციებზე პირდაპირ წამოეგო და არავითარი მცდელობა ჰქონდა, რომ ომი თავიდან აცილებულიყო. ამის შემდეგ ვხედავთ, რომ ისინი ურცხვად გამოთქვამენ პრეტენზიას ხელისუფლებაში დაბრუნებაზე…“, – აღნიშნა ირაკლი ღარიბაშვილმა.